नेकपा एसमा मधेशी साफ ! पदाधिकारी चुनावमा मधेशी कोटामा साह बाहेक सबै पराजित

• भदौ १३, २०८१ | ८३ पटक पढिएको | सीमा संदेश

नेकपा एकीकृत समाजवादी (नेकपा एस)को पदाधिकारीका लागि भएको चुनावमा मधेशी उपाध्यक्षमा धर्मनाथ साह बाहेक सबै मधेशी नेता पराजित भएका छन् ।

उपाध्यक्षका लागि छुट्टयाइएको मधेशी कोटामा साह र रामचन्द्र झा प्रतिस्पर्धा गरेका थिए । नेकपा एसका अध्यक्ष माधवकुमार नेपालको प्यानलबाट रहेका पूर्वमन्त्री समेत रहेका नेता झा २० मतले पराजित भएका छन् । नेता साहले १ सय ६४ मत प्राप्त गरेका थिए । झाले १ सय ४४ मत प्राप्त गरे ।

नेकपा एसमा १८ केन्द्रीय पदाधिकारीका लागि मंगलवार साँझ मतदान भएको थियो । अध्यक्षमा माधवकुमार नेपाल, वरिष्ठ नेतामा झलनाथ खनाल र महासचिवमा घनश्याम भुषाल यस अघि नै सर्वसम्मत भइसकेका थिए । वरिष्ठ उपाध्यक्षमा राजेन्द्र प्रसाद पाण्डे पनि मंगलबार निर्विरोध भएका थिए । उपाध्यक्ष खुला, उपमहासचिव र सचिवमा मधेशी नेताहरुले उम्मेदवारी दिएका थिए ।तर उनीहरुले सम्मानजनक मत समेत पाउन सकेनन् ।

उपाध्यक्षमा निर्वाचित साह बाहेक अधिकांश मधेशी नेताहरुले अध्यक्ष नेपालको गुटबाट उम्मेदवारी दिएका थिए । तर सबै पराजित भएका छन् । सार्वजानिक मतपरिणाम अनुसार पार्टीको उपाध्यक्ष पद (महिला)मा जयन्ती राई, उपाध्यक्ष (मधेसी समुदाय)मा धर्मनाथ साह निर्वाचित भएका छन् । महिला उपाध्यक्षमा चर्चित युवा नेत्री रामकुमार झाँक्री पराजित भएका छन् ।

खुला उपाध्यक्षहरुमा जगन्नाथ खतिवडा, डा. गङ्गालाल तुलाधर, भानुभक्त जोशी र प्रकाश ज्वाला निर्वाचित भएका छन् । यसैगरी उपमहासचिवमा राजेन्द्रकुमार राई, मेटमणि चौधरी, रामकुमार भट्टराई र गरिमा शाह निर्वाचित भएको पार्टीको निर्वाचन आयोगले जनाएको छ । उपमहासचिवमा उम्मेदवारी दिएका रामचन्द्र यादवले ७६ मत, सत्रुधन महतोले ४२ मत र श्रीप्रसाद साहले २८ मत प्राप्त गरे ।

४ उपमहासचिव पदका लागि १९ जनाले उम्मेदवारी दिएकोमा मधेशबाट यादव, महतो र साहगरि ३ जनाले उम्मेदवारी दिएका थिए । एसको सचिव पदमा (समावेशी)मा बलदेव चौधरी र सचिव (दलित) मा गणेश विक, सचिव (खुला) मा शेरबहादुर कुँवर, चन्द्रबहादुर शाही, सोमप्रसाद पाण्डे, सावित्री भुसाल र श्रीनाथ बराल निर्वाचित भएका छन् । सचिवमा उम्मेदवारी दिएका वंशीधर मिश्रले ६५ र रत्नेश्वर गोइत यादवले १३ मत प्राप्तगरि पराजित भएका छन् ।

खुला सचिवमा २ जना मधेशी मिश्र र यादवले उम्मेदवारी दिएका थिए । गत असारमा सम्पन्न महाधिवेशनमा पदाधिकारीको चयन हुन सकेको थिएन् ।अध्यक्ष, वरिष्ठ नेता, वरिष्ठ उपाध्यक्ष र महासचिवमा सर्वसम्मत भएपनि अन्य पदाधिकारीका लागि चुनाव गराइएको थियो । नेकपा एसको संगठन मधेश प्रदेशमा तुलनात्मक रुपमा राम्रो मानिन्छ ।

एसको मधेश प्रदेशमा ७ जना सभासद रहेका छन् । चुनाव परिणामपछि मधेशी नेताहरुमा व्यापक असन्तुष्टि देखिएको छ । पदाधिकारीमा उपाध्यक्ष साह बाहेक मधेशबाट अन्य नेताहरु जान पाएका छैनन् । हुन त नेकपा एसलाई कट्टर मधेश विरोधी मानिन्छ । अध्यक्ष नेपाल पनि मधेशको मुद्दामा अत्यन्त कट्टर छन् ।