संसद्मा सांसद गंगाको व्यंग्य ‘हरियो वन, तस्करको धन’

• जेठ २५, २०७७ | ९१४ पटक पढिएको | सीमा संदेश

काठमाडौं, (नेस) । मुलुकभित्र वैज्ञानिक वन व्यवस्थापनको नाममा वन विनाश भइरहेको भन्दै सत्तारूढ दल नेकपाका सांसद गंगा चौधरीले नेपालको वन तस्करको धन भनेर व्यंग्य गर्नुभयो ।

मन्त्रालयगत बजेटमाथि छलफलका क्रममा शनिबार संसद्मा बोल्दै सांसद चौधरीले नारा जस्तो व्यवस्थापन नभएको भन्दै वैज्ञानिक वन व्यवस्थापन कार्य रोकिनुपर्ने धारणा राख्नुभयो ।

‘वनसम्बन्धी नारा असाध्यै राम्रो छ । हरियो वन नेपालको धन तर पछिल्लोपटकको वैज्ञानिक वन व्यवस्थापनले गर्दा हरियो वन तस्करको धन सावित भएको छ ।’ –उहाँले भन्नुभयो ।

वैज्ञानिक वन व्यवस्थापन गर्दा उल्टै वन विनाश हुँदै गरेको दाबी गर्दै उहाँले वन विनाश रोक्न यस कार्य यथाशीघ्र रोकिनुपर्ने धारणा राख्नुभयो ।

वन व्यवस्थापनको नाममा पछिल्लो चरण सुदूरपश्चिमलगायत चुरेका साथै मुलुकभर काठको अवैध ओसारपसार भएको भन्दै तीव्र आलोचना भइरहेको छ । वैज्ञानिक वन व्यवस्थापनको नाममा वनमा अत्यावश्यकरूपमा काठ निकाल्ने कार्यमा मात्रै ध्यान गएको गुनासो बाहिर आएको छ ।