भारत–चीन सिमामा भिडन्त : ५ जना चीनीयाँ र ३ भारतीय सैनिकको मृत्यु

• असार २, २०७७ | ७५७ पटक पढिएको | सीमा संदेश

भारतीय र चीनीयाँ सैनिकबीच भएको झडपमा तीय भारतीय र ५ जना चीनी सैनिकको मृत्यु भएको छ ।

दुबै देशको सीमा क्षेत्र लद्दाखको गलवान भ्यालीमा भएको हिंसात्मक झडपमा भारतका एक आर्मी अफिसर र दुइ जना सिपाही मारिएको भारतीय सेनाले जनाएको छ ।

तर पाँच जना चीनीयाँ सैनिक मारिएको भारतीय संचारमाध्यमले दावी गरेपनि आधिकारीक पुष्टि हुन सकेको छैन् । सन् १९७५ पछि पहिलोपटक नियन्त्रण रेखामा भारतीय सेनाको ज्यान गएको हो ।

भारतीय सेनाका प्रवक्ताले एक वक्तव्य जारी गर्दै भारतीय भूमिमा सेनाका एक अधिकारी र दुई जवान मारिएको दाबी गरेका छन् । वक्तव्यमा अहिले दुई पक्षका वरिष्ठ सैनिक अधिकारीहरुको बीचमा वार्ता भइरहेको र स्थिति सहज बनाउने प्रयास भइरहेको उल्लेख छ ।

चीनले भने भारतीय सैनिकले सीमा नाघेकाले झडपको अवस्था सृजना भएको बताएको छ । चिनियाँ विदेश मन्त्रालयका प्रवक्ता झाओ लिजियानले सोमबार मात्र भारतीय सेनाले दुईपटक सीमा पार गरेको बताएका हुन् ।

उनीहरुले चिनियाँ सुरक्षाकर्मीमाथि आक्रमण गरेकाले गम्भीर रुपमा झडप भएको उनले बताएका छन् ।
सीमा क्षेत्रमा बारम्बार तनाव उत्पन्न हुने गरे पनि गोली नचलेको लामो समय भइसकेको थियो । तर एक महिनादेखि लद्दाखमा भारतले गरेको बाटो विस्तारलाई लिएर दुई देशबीच नयाँ तनाव उत्पन्न भएको थियो । दुवै मुलुकले सीमाक्षेत्रमा आफ्नो सैनिकको संख्या बढाएका थिए भने ६ जुनमा वार्ता पनि भएको थियो ।