विश्वभर एकैदिनमा थपिए एक लाख ६० हजारभन्दा बढी कोरोनाका बिरामी

• असार १०, २०७७ | ८०२ पटक पढिएको | सीमा संदेश

सिरहा । विश्वभर एकैदिनमा एक लाख ६० हजारभन्दा बढी कोरोनाका बिरामी थपिएका छन् । मंगलबारमा मात्रै एक लाख ६० हजार ६९८ जनामा संक्रमण देखिएको हो ।

विश्व स्वास्थ्य संगठनका अनुसार विश्वभर कोरोना संक्रमितको संख्या ९३ लाख ४३ हजार २७३ पुगेको छ भने ज्यान गुमाउनेको संख्या चार लाख ७८ हजार नाघेको छ । गएको २४ घण्टामा मात्रै पाँच हजार ४३६ जनाले ज्यान गुमाएपछि मृत्यु हुनेको संख्या चार लाख ७८ हजार ९२० पुगेको हो ।

संक्रमितमध्ये ५० लाख ३६ हजार ६७४ जनाको सफल उपचार भएको छ भने ३८ लाख २७ हजारभन्दा बढी व्यक्तिको उपचार भइरहेको छ । त्यस्तै उपचाररतमध्ये नै ५७ हजार ९१२ जनाको अवस्था भने चिन्ताजनक रहेको छ ।

सबैभन्दा बढी भाइरस फैलिएको अमेरिकामा संक्रमितको संख्या २४ लाख २४ हजार नाघेको छ । गएको २४ घण्टामा मात्रै अमेरिकामा ३५ हजार ९९१ जनामा भाइरस देखिएपछि संक्रमितको संख्या २४ लाख २४ हजार १४४ पुगेको हो । त्यस्तै एक लाख २३ हजार ४७३ जनाले ज्यान गुमाएका छन् ।

उपचारपछि निको हुने संक्रमितको संख्या पनि निकै बढेको छ । अमेरिकामा अहिलेसम्म १० लाख २० हजार संक्रमितको उपचार सफल भएको छ भने १२ लाख ८० हजार संक्रमितको उपचार भइरहेको छ ।

ब्राजिलमा कोरोना संक्रमितको संख्या ११ लाख ५१ हजार नाघेको छ । गएको २४ घण्टामा मात्रै ४० हजार १३१ जना संक्रमित थपिएपछि ब्राजिलमा संक्रमितको संख्या ११ लाख ५१ हजार ४७९ पुगेको हो । त्यस्तै ज्यान गुमाउनेको संख्या पनि एकै दिनमा एक हजार ३६४ थपिएपछि ज्यान गुमाउनेको संख्या ५२ हजार ७७१ पुगेको हो ।