बलात्कारीलाई सार्वजनिक ठाउँमा गोली ठोक्नुपर्छ : मुख्यमन्त्री राउत

• असोज २३, २०७७ | ४५६ पटक पढिएको | सीमा संदेश

जनकपुरधाम । प्रदेश २ का मुख्यमन्त्री लालबाबु राउतले बलात्कारीलाई सार्वजनिक ठाउँमा गोली ठोक्नुपर्ने बताएका छन् ।

बलात्कार गर्नेलाई आजीवन कैद गरेर मात्र नहुने भन्दै उनले भने, ‘बलात्कार जस्तो जघन्य अपराध गर्नेलाई मृत्युदण्ड दिनुपर्छ । म त भन्छु संविधान संशोधन गरी ठोली नै ठोक्ने कानुन बनाउनुपर्छ ।’

सञ्चारकर्मीसँग कुरा गर्दै मुख्यमन्त्री राउतले प्रश्न गरे, ‘सबैभन्दा ठूलो लोकतन्त्र र मानवअधिकारको वकालत गर्ने देश अमेरिकामा पनि मृत्युदण्ड दिने कानुन छ तर यहाँ किन हुन सक्दैन ?’ भारत, चीन, पाकिस्तानसहित धेरै लोकतान्त्रिक मुलुकले बलात्कारीलाई मृत्युदण्ड दिने कानुन बनाएको उनको भनाई छ ।

पछिल्लो समय बलात्कारको घटना ह्वात्तै बढेकोप्रति उनले चिन्ता व्यक्त गरेका छन् । उनले कडा किसिमको सजायँ भएमात्रै बलात्कारका घटना कम हुने बताए । गाउँघरमै पञ्चायती गरी बलात्कारीलाई उन्मुक्ति दिनु कदापि ठीक नभएको उनको तर्क छ ।