मुख्यमन्त्री राउतको राजीनामा माग्दै जनकपुरमा जनमत पार्टीको प्रदर्शन

• असोज १८, २०७८ | ५८६ पटक पढिएको | सीमा संदेश

जनकपुरधाम, असोज १८ गते । प्रदेश २ का मुख्यमन्त्री लालबाबु राउतको विरोध गर्दै सिके राउत नेतृत्वको जनमत पार्टीले जनकपुरधाममा प्रदर्शन गरेका छन् ।

सोमबार दिउँसो पार्टीका नेताकार्यकर्ताले प्रदेश २ सरकार भ्रष्ट भएको भन्दै सो पार्टीले मुख्यमन्त्रीको राजीनामा पनि माग गरेको छ । 

उनीहरूले ‘साइकल चोर- सरकार छोड् । भ्रष्ट सरकार-राजीनामा दे १ मधेशी जनता के भन्छ ? भ्रष्टाचारीलाई जेल दे भन्छ’ लगायतका नारा लगाउँदै प्रदर्शन गरेका थिए । 

मुख्यमन्त्री कार्यालय मातहत सञ्चालित ‘मुख्यमन्त्री बेटी पढाऊ, बेटी बचाऊ अभियान’मा अनियमितता भएको उजुरी परेपछि १३ असोजमा प्रदेश २ को मुख्यमन्त्री तथा मन्त्रिपरिषद् कार्यालयमा अख्तियार दुरुपयोग अनुसन्धान आयोगले छापा मारेको थियो ।

२०७६ असार १६ गते मुख्यमन्त्रीको अध्यक्षतामा बसेको बैठकले सामुदायिक विद्यालयमा अध्ययनरत छात्रालाई साइकल वितरण गर्ने निर्णय गरी ९ करोड ८४ लाख १८ हजार मूल्यका १४ हजार थान साइकल २६२ विद्यालयका प्रधानाध्यापक वा विद्यालयका प्रतिनिधिलाई ८ कक्षामा पढ्ने छात्रा संख्याको आधारमा उपलब्ध गराएको थियो ।

त्यसक्रममा अनियमितता भएको कुरा महालेखा परीक्षकको प्रतिवेदनले समेत औंल्याएको छ । यसअघि जनता समाजवादी पार्टीले दुईदिन प्रदेश २ का आठै जिल्लामा अख्तियारविरुद्ध प्रदर्शन गरेका थिए ।