चिट चोर्न नदिएको भन्दै विद्यार्थीले कुटे सहायक क्याम्पस प्रमुख, लगाइयो सात टाँका

• पुस ६, २०७८ | ५५० पटक पढिएको | सीमा संदेश

काठमाडौं, पुस ६ गते । परीक्षामा चिट चोरी गर्न नदिएको भन्दै विद्यार्थीले शिक्षकलाई कुटेका छन् । काठमाडौंको प्रदर्शनीमार्गस्थित रत्नराज्यलक्ष्मी क्याम्पस (आरआर) का विद्यार्थीले शिक्षकलाई कुटेका छन् ।

चिट चोरिरहेको फेला पारेपछि विद्यार्थी कुवेर जेठारालाई गार्ड बसेका शिक्षकले परीक्षा हलबाट बाहिर निकालेका थिए ।

परीक्षा सकिएपछि विद्यार्थी जेठाराले आफ्ना अरू साथीहरूलाई पनि क्याम्पसमा बोलाएका थिए ।

विवाद भएपछि शिक्षक तथा विद्यार्थीबीच सहायक क्याम्पस प्रमुखको कोठामा छलफल गरिएको थियो। सोही बेला विवाद हुँदा विद्यार्थी जेठाराले सहायक क्याम्पस प्रमुख प्रकाश पुडासैनीमाथि कुटपिट गरेका छन् । पुडासैनी नै आफैं परीक्षामा गार्ड बसेका थिए।

विद्यार्थीले पानी पिउन प्रयोग हुने स्टिलको जगले शिक्षक पुडासैनीको टाउकोमा प्रहार गरेको प्रत्यक्षदर्शी एक शिक्षकले बताए।

घाइते भएका शिक्षकको मोडल अस्पताल उपचार भइरहेको छ जहाँ उनको टाउकोमा सात वटा टाँका लगाइएको छ।

विवादपछि परीक्षा स्थगित गरिएको छ।