चीनमा लकडाउनमा रहेका वासिन्दाहरु खाद्य अभावपछि चुरोटसँग बन्दाकोपी साट्दै

• पुस २५, २०७८ | ४७५ पटक पढिएको | सीमा संदेश

हाल लकडाउनमा रहेका चीनको जिआन शहरका वासिन्दाहरुले खाद्य सामग्रीको लगातार अभावपछि यसको समाधानमा आफूसँग भएका सामानहरु साट्न थालेका छन् । 

सामाजिक संजालमा गरिएको एक पोस्टमा वासिन्दाहरुले खानाको बदलामा चुरोटदेखि प्राविधिक ग्याजेटसम्म साटिरहेको देख्न सकिन्छ ।

डिसेम्बर २३ देखि जिआनका १ करोड ३० लाख मानिसहरु घर भित्रै थुनिएर बसेका छन् र उनीहरु खानेकुरा किन्नका लागि समेत बाहिर निस्कन पाउँदैनन् । 

एउटा भिडियोमा वासिन्दाले एक प्याकेट चाउचाउ र ‘स्टिम्ड बन्स’ सँग आफ्नो निन्टेन्डो स्वीच कन्सोल साटिरहेको देखिएको छ ।

त्यस्तै वेइबोमा पोस्ट गरिएको अर्को भिडियोमा चुरोटसँग बन्दाकोपी, भाँडा माझ्ने लिक्वीडसँग स्याउ, स्यानिटरी प्याडसँग एउटा भाग तरकारी साटिरहेको देखिएको छ । 

वाङ थर भएका एक स्थानीयले रेडियो फ्रि एसियासँग बोल्दै भने, “एउटै भवनमा बस्ने मानिसहरुले आफूसँग भएका विभिन्न सामानहरु साटिरहेका छन् किनकी उनीहरुसँग खानलाई पर्याप्त बाँकी छैन । ” रिपोर्टका अनुसार एक व्यक्तिले त चामलका लागि स्मार्टफोन र ट्याब्लेट साट्न खोजिरहेका थिए । 

एक वेइबो प्रयोगकर्ताले भनेका छन्, “मद्दतविहिन नागरिकहरु फेरि सट्टापट्टा गर्ने युगमा पुगेका छन् । यहाँ रुवासँग आलु साट्न थालिएको छ । ” त्यस्तै अर्का एकजनाले मानिसहरु फेरि परापूर्वकालमा फर्किएको भनि व्याख्या गरेका हुन् । 

अर्कोतर्फ कतिपयले चाहिँ यस्तो आदनप्रदानले मानवता अझै जिवित रहेको देखाएकाले आफूहरु छिमेकको दयाप्रति भावुक बनेको बताएका हुन् । 

हाल जिआन शहर चीनमा कोरोना प्रकोपको केन्द्र बनेको छ । यस्तोमा घरभित्रै बस्न बाध्य नागरिकहरुको उचित व्यवस्थापन नगरिएकामा जिआनका निकायहरु आलोचित भइरहेका छन् । केही समय अगाडि मात्र मिंगदे ८ हाउजिङ  कम्पाउन्डका वासिन्दाहरुलाई जनवरी १ को मध्यरातमा सबैले घर छाडेर क्वारेन्टिनमा बस्न जानुपर्ने खबर गरिएको थियो । 

त्यस्तै भाइरल भएको एउटा पोस्टमा चाहिँ जिआनका स्थानीयले आफ्नो बुवालाई ह्दयघात हुँदा सबै अस्पतालले कोभिडको चापका कारण ठाउँ नभएर फर्काउने क्रममा मृत्यु भएको बताएका छन् । यसबारे अस्पतालले कुनै प्रतिक्रिया दिएको छैन । 

उता मंगलबार मात्र सरकारी निकायहरुले अर्को शहरलाई पनि पूर्ण लकडाउनको घोषणा गरेका छन् । केबल तीनवटा लक्षण विहिन संक्रमित फेला पर्नासाथ यस्तो निर्णय गरिएको थियो ।