निजी विद्यालय सञ्चालकले भने : गुठीमा लैजाने भए आजै चाबी दिन्छौं

• साउन २५, २०८० | १,०७१ पटक पढिएको | बैधनाथ कुमार यादब

सिरहा, २५ श्रावण । प्रस्तावित विद्यालय शिक्षा ऐनमा सरकारले निजी विद्यालयलाई ५ वर्षभित्र गुठीमा जानुपर्ने व्यवस्था राखेकोमा सिरहाका विद्यालय सञ्चालकले विरोध गरेका छन् । प्याब्सन, एनप्याब्सन र हिसान सिरहा जिल्ला समितिले सरकारले हचुवाको भरमा ५ वर्षभित्र शैक्षिक गुठीमा लैजाने व्यवस्था राखेको भन्दै विरोध जनाएका हुन् ।

प्याब्सनका सिरहा जिल्ला अध्यक्ष महेश चौधरीले विधेयकको यो व्यवस्था परिवर्तन नगरे अहिले नै विद्यालयको तालाचाबी बुझाउने चेतावनी दिए । निजी विद्यालयले गुणस्तरीय शिक्षा दिइरहेको भन्दै उनले सरकारले व्यवस्थापन गर्न सक्ने होे भने ५ वर्ष नकुरी अहिले नै निजी विद्यालयहरुको जिम्मा लिनुपर्ने भन्दै जिल्ला प्रशासन कार्यालय प्रमुख जिल्ला अधिकारी ,  शिक्षा समन्वय ईकाइ समिति लगायत १७ पालिकामा ज्ञापनपत्र बुझाएका छन् ।

‘५ वर्षपछि किन गुठीमा लैजानुप¥यो, आजै लगे हुन्छ, हामी तालाचाबी बुझाउन तयार छौं’ चौधरीले भने, ‘यदि सरकारले निजीले जत्तिको गुणस्तरीय शिक्षा दिन सक्छ भने आजै चाबी लिए हुन्छ ।’

सञ्चालकहरुले पहिले जबरजस्ती कम्पनीमा जान लगाएको र कहिले कानुनी व्यवस्थाअनुसार चलिरहेका निजी विद्यालयलाई गुठीमा लैजान खोजेको भन्दै आपत्ति जनाएका छन् । एनप्यपसन सिरहाका अध्यक्ष लालबाबु यादबले व्यक्तिको सम्पत्ति विकल्प विना राज्यका नाममा परिवर्तन गर् भन्नु नाजायज भएको बताए ।

‘सेवामूलक संस्थालाई राज्यले चाहना विपरीत कम्पनीमा जा भन्यो, हामी गयौं । कानुनी आधारमै चलेका विद्यालयलाई उनीहरुसँग सल्लाहै नगरी व्यक्तिगत सम्पत्तिलाई सार्वजनिक गुठीमा लैजा भन्नु संविधानकै भावना विपरीत छ’ यादबले भने ।

सरकारले ऐन मार्फत कर प्रणाली चुस्त बनाएर निजी विद्यालयलाई कसिलो नियमन गर्ला भनेको उल्टो व्यक्तिको सम्पत्ति खोस्न खोजेको निजी विद्यालयका प्रतिनिधिहरुको भनाइ छ । निजी विद्यालय संचालकले निजी विद्यालयका सञ्चालक यो देशका नागरिक नै होइनन् भन्ने राज्यले व्यवहार गरेको बताए ।