एमाले मधेश प्रदेश अधिवेशनको तयारी तीव्र

• असोज ७, २०८० | ३४८ पटक पढिएको | सीमा संदेश

एमालेको मधेश प्रदेशको अधिवेशनको तयारी तीव्र पारिएको छ ।

असोज २४ गतेदेखि जनकपुरमा हुने सो अधिवेशनका लागि विभिन्न समिति र उपसमितिहरू बनाएर तयारी तीव्र पारिएको एमाले मधेश प्रदेश कमिटीका अध्यक्ष राम अवतार यादवले जनाएका छन् । अधिवेशनका लागि १५० स्वयंसेवक र ५० जना पर्यवेक्षक खटाइने तयारी भइरहेको छ । प्रदेश अध्यक्ष यादवको संयोजकत्वमा प्रतिनिधि छनोट तथा व्यवस्थापन समिति गठन गरिएको छ भने प्रदेश उपाध्यक्ष रेवती पन्तको संयोजकत्वमा जनपरिचालन समिति गठन गरिएको बताइएको छ ।

कमल किशोर चौधरीको संयोजकत्वमा स्वयंसेवक परिचालन समिति, शिवशंकर साहको संयोजकत्वमा भोजन व्यवस्थापन समिति, मोहम्मद कायस्थको संयोजकत्वमा आवास व्यवस्थापन समिति गठन गरिएको अध्यक्ष यादवले बताए । जनकपुरधामको महेन्द्रनारायण निधि प्रतिष्ठानमा हुने अधिवेशनको उद्घाटन एमालेका अध्यक्ष केपी शर्मा ओलीले गर्ने तय भएको उनले बताए । उनले असोज २४ गतेदेखि २६ गतेसम्म हुने सो अधिवेशनका लागि प्रतिनिधिको पनि अन्तिम रूप दिने काम भइरहेको बताए । मधेश प्रदेशका आठ वटै जिल्लामा रहेको करिब ६० हजार सक्रिय सदस्य मध्येबाट एक हजार अधिवेशन प्रतिनिधि छनोट गरिने छ ।

असोज १३ गते मधेश प्रदेशको १३६ वटै पालिकामा मनोनयन दर्ताको कार्यक्रम राखिएको छ । अधिवेशनका लागि मूल नारा सहितको ब्यानर र लोगो असोज ११ गते सार्वजनिक गरिने उनले बताए । अधिवेशनबाट महिला, दलित, आदिवासी जनजाति, युवासहितका क्लस्टर र विभिन्न जनवर्गीय संगठनबाट प्रतिनिधित्व हुने गरी २३५ सदस्यीय प्रदेश कमिटी चयन गरिनेछ ।