मृत्यु भइसकेको भनिएका चलितर २५ वर्षपछि गाउँ फर्केपछि…

• कार्तिक १९, २०८१ | ४८२ पटक पढिएको | सीमा संदेश

धनुषाको बटेश्वर गाउँपालिका-१, लक्ष्मीनिबास सोनापुरका ५८ वर्षीय चलितर महतो २५ वर्षपछि आफ्नो गाउँ फर्किएका छन्। युवा उमेरमा मजदुरीको लागि भारतको पञ्जाब गएका महतो वृद्धावस्थामा घर फर्किएपछि घरपरिवार र गाउँलेहरु चकित भएका छन्।

महतोको वर्षौंसम्म कुनै खबर नआउँदा परिवार र गाउँलेहरुले उनको मृत्युको आकलन गरेका थिए। तर, अचानक फर्किएपछि सबैजना आश्चर्यचकित भएका छन्।

चलितर महतोले पञ्जाबमा एक साहुले आफूलाई बन्धक बनाएर श्रम गराएको बताएका छन्। “मालिकले बाहिर जाने कुरा गर्नासाथ काटेर फाल्ने धम्की दिन्थे। डरले बाहिर निस्किन सक्दिनथेँ। मलाई गाईवस्तु पाल्न लगाइएको थियो,” उनले भने।

उनले भारतको बिहार, सितामढीका मंगल महतोसँग चिनजान भएपछि बन्धनबाट छुटकारा पाएको बताए। मंगल महतोको पहलमा परपञ्चायत बसेपछि साहुले उनलाई घर फर्कन अनुमति दिएको महतोले सुनाए।

बन्धक बनेर काम गर्दा कुनै पारिश्रमिक नपाएको उनले गुनासो गरे। तर, अन्ततः आफू उद्धार भएर गाउँ फर्किन पाउँदा अत्यन्त खुसी भएको महतोले बताए।

चलितर घर नफर्किँदा अस्तव्यस्त बनेको उनको विपन्न परिवार केही वर्ष अघि सर्लाहीको हरिवन नगरपालिकाको घुर्कौली सरेको थियो। उनका छोरा प्रविण महतो त्यहाँ खाजा पसल चलाएर परिवार पाल्दै आएका छन्। तर, नागरिकता र जन्मदर्ता नभएका कारण परिवार समस्यामा परेको थियो।

चलितरको आगमनले उनका परिवारजन उत्साहित भएका छन् र उनीहरुलाई स्वागत गर्न साविक गाउँ सोनापुर आउँदैछन्।