चौरमै सदन सञ्चालन

• कार्तिक ३०, २०८२ | १७५ पटक पढिएको | सीमा संदेश

तत्कालीन प्रदेश प्रमुख सुमित्रा सुवेदी भण्डारीले असंवैधानिक तरिकाले मुख्यमन्त्रीमा सरोजकुमार यादवलाई नियुक्त गरेपछि सात दलीय गठबन्धनले आन्दोलनलाई निरन्तरता दिँदै सांकेतिक रुपमा विरोधदेखि बहिष्कारसम्मको कार्यक्रम गरेको छ ।

जनकपुरधाममा शनिबार मधेश प्रदेशसभा सचिवालयमा तालबन्दी गरिएको र कर्मचारीसमेत अनुपस्थित रहेको भन्दै चौरमै गठबन्धन घटक दलका सांसदको उपस्थितिमा प्रदेशसभाको परिसरको चौरमा बसेर उपसभामुख बबिता राउत इसरको अध्यक्षतामा सदन सञ्चालन गरिएको थियो ।

सो सदनमा नेपाली कांग्रेस मधेश प्रदेशका संसदीय दलका नेता कृष्णप्रसाद यादव र जसपा नेपाल मधेश प्रदेशका संसदीय दलका नेता सरोजकुमार यादवले मुख्यमन्त्री सरोजकुमार यादवलाई नियुक्त गरिएको घटना क्रमदेखि सभामुखको गलत आचरणलगायतका बारेमा उपसभामुख इसरलाई जानकारी गराएका थिए ।

त्यसपछि उपसभामुख इसरले प्रदेश सभाका सभामुख रामचन्द्र मण्डलले पाँच जना सांसदलाई गरेको कारबाही कानुनसम्मत नरहेकाले फुकुवा गरिएको जनाइन् ।

सदनमा सांसदहरुलाई सम्बोधन गर्दै उनले सभामुख रामचन्द्र मण्डलको कदम असंवैधानिक रहेको टिप्पणी गरिन् ।

सो क्रममा गठबन्धनले प्रदेशसभा अगाडि प्रदर्शनसमेत गरेका थिए ।यता मधेशका प्रदेश प्रमुख डा. सुरेन्द्र लाभले आह्वान गरेको सर्वदलीय बैठकमा सात दलीय गठबन्धनले बहिष्कार गरेको छ ।

सो बैठकमा असंवैधानिक रुपमा नियुक्त भएका मुख्यमन्त्री सरोजकुमार यादवसमेत सहभागी भएको भन्दै सात दलीय गठबन्धनले सो सर्वदलीय बैठकमा बहिष्कार गरेको जसपा नेपाल मधेश प्रदेशका प्रमुख सचेतक रामअशिष यादवले जानकारी दिए ।

संवैधानिक रुपमै मुख्यमन्त्री नबनेपछि सर्वोच्च अदालतले पनि मुख्यमन्त्री सरोजकुमार यादवलाई कामकारबाही नगर्न भन्दै अन्तरिम आदेश जारी गरेकाले आफूहरु प्रदेश प्रमुखले आह्वान गरेको बैठक बहिष्कार गरेको उनले स्पष्ट पारे ।