हत्या गरी फरार रहेको आरोपमा यादव ससुरालीबाट पक्राउ

• जेठ १८, २०७७ | २७० पटक पढिएको | सीमा संदेश

सिरहा । सिरहामा हत्या गरी फरार रहेको आरोपमा एकजनालाई प्रहरीले ससुरालीबाट पक्राउ गरेको छ । पक्राउ पर्नेमा सिरहाको मिर्चेया नगरपालिका १ बस्ने २० वर्षीय इन्दल भनिने रुपेश यादव छन् ।

उनी दुई वर्षअघि एकजनाको घाँटी रेटेर हत्या गरी मिर्चेया नगरपालिकाकै सितापुरस्थित ससुरालीमा बस्दै आएका थिए ।

पक्राउ परेका यादवले २०७४ साल असोज २३ गते सिरहाकै कर्जन्हा नगरपालिका १० निवासी ३६ वर्षीय शशीभूषण प्रसाद साहलाई कुटपिट गर्दै घाँटी रेटेर हत्या गरेको सिरहाका प्रहरी उपरीक्षक उमाप्रसाद चर्तुवेदीले जानकारी दिए ।

हत्या गरी फरार रहेका उनलाई ससुराली घरमा लुकेको अवस्थामा प्रदेश प्रहरी कार्यालय, जनकपुरधाम र जिल्ला प्रहरी कार्यालयबाट संयुक्त रुपमा खटिएको टोलीले पक्राउ गरेको एसपी चर्तुवेदीले बताए ।

पक्राउ परेका उनलाई सिरहा जिल्ला अदालतमा पेस गरिने छ ।

साहको हत्या घटनामा संलग्न सोमन भनिने राम ईश्वर कापरीलाई सिरहा जिल्ला अदालतको २०७४ साल पुस २५ गतेको आदेशले पूर्पक्षका लागि कारागार चलान गरिसकेको छ ।