एकैदिन २०२० जनामा कोरोना संक्रमण पुष्टि, ८ जनाको मृत्यु

असोज २, २०७७ | ५४६ पटक पढिएको | सीमा संदेश

सिरहा । पछिल्लो २४ घण्टामा २०२० जनामा कोरोना भाइरस (कोभिड-१९) को संक्रमण पुष्टि भएको छ र संक्रमणकै कारण ८ जनाको मृत्यु भएको छ ।

देशभरका प्रयोगशालामा ११ हजार ४५८ नमुना परीक्षण गर्दा ६३९ महिला र १३८१ पुरुषमा संक्रमण पुष्टि भएको हो । सबैभन्दा धेरै काठमाडौंका ६९८ जनामा संक्रमण पुष्टि भएको छ । यस्तै चितवनका १९१, मोरङका ११८, सुर्खेतका ११७ जनामा संक्रमण देखिएको स्वास्थ्य तथा जनसंख्या मन्त्रालयले जनाएको छ ।

थप ८ जनाको मृत्यु

काठमाडौं र धनुषाका २/२ जना, भक्तपुर, सर्लाही, नवलपरासी र मोरङका १/१ जनाको मृत्यु भएको हो । देशभरका अस्पतालमा गरी ३६ जना भेन्टिलेटरमा छन् भने १७३ जनाको आईसीयूमा उपचाररत छन् । सबैभन्दा धेरै बाग्मतीमा १२६ जना आईसीयू र ३४ जना भेन्टिलेटरमा छन् ।

काठमाडौं महानगरपालिका-२७, काठमाडौंका ८८ वर्षीय पुरुषको पाटन अस्पतालमा मृत्यु भएको छ । मिर्गौला र उच्च रक्तचापका बिरामी उनलाई भदौ १७ गते कोरोना संक्रमण पुष्टि भएको थियो ।

काठमाडौं महानगरपालिका-५ हाँडीगाउँ, काठमाडौंकी ८५ वर्षीयाको ओम अस्पतालमा बिहीबार मृत्यु भएको छ । दमको बिरामी उनलाई श्वास प्रश्वासमा अप्ठ्यारो भएपछि २५ भदौमा अस्पताल भर्ना गरिएको थियो भने २८ गते कोरोना संक्रमण पुष्टि भएको थियो ।

सबैला नगरपालिका-३, धनुषाका ६८ वर्षीय पुरुषको शुक्रबार प्रादेशिक अस्पतालमा मृत्यु भएको छ । उनी मिर्गौलासम्बन्धी समस्याबाट समेत पीडित थिए ।

बटेश्वर गाउँपालिका-५, धनुषाका ७० वर्षीय पुरुषको पनि प्रादेशिक अस्पतालमा मृत्यु भएको छ । ज्वरो आउनुका साथै श्वासप्रश्वासमा समस्या भएपछि उनी २२ भदौमा अस्पताल भर्ना भएका थिए ।

मध्यपुर थिमी-५, भक्तपुरका ८२ वर्षीय पुरुषको बिहीबार वीर अस्पतालमा मृत्यु भएको छ । मधुमेह र उच्च रक्तचापका बिरामी उनलाई २६ गते कोरोना संक्रमण पुष्टि भएको थियो । श्वासप्रश्वासमा समस्या भएपछि उनी त्यही दिन अस्पताल भर्ना भएका थिए ।

हरिहर गाउँपालिका, सर्लाहीका ५५ वर्षीय पुरुषको शुक्रबार चितवनको भरतपुर अस्पतालमा मृत्यु भएको छ । मिर्गौलामा समस्या देखिएपछि डायलायसिस गराउँदै आएका उनलाई भदौ १८ गते कोरोना पुष्टि भएको थियो । उनको स्वासप्रश्वासमा समस्या देखिएको थियो ।

देवचुली नगरपालिका-११, नवलपरासी पूर्वका ३१ वर्षीय पुरुषको शुक्रबार चितवन मेडिकल कलेज, चितवनमा मृत्यु भएको छ । २६ गते अस्पताल भर्ना भएका उनलाई कोरोना संक्रमण भएको भोलिपल्ट पुष्टि भएको थियो ।

बिराट मेडिकल कलेजमा बिहीबार मृत्यु भएका विरानगर महानगरपालिका-१०, मोरङका ६६ वर्षीय पुरुषमा कोरोना संक्रमण पुष्टि भएको छ । उनी ज्वरो र श्वासप्रश्वासम्बन्धी समस्या लिएर ३० भदौमा अस्पताल भर्ना भएका थिए ।

संक्रमितको संख्या ६१ हजार नाघ्यो

कुल संक्रमितको संख्या ६१ हजार ५९३ पुगेको छ । उनीहरुमध्ये ३९० जनाको मृत्यु भएको छ भने ४३ हजार ८२० जना संक्रमणमुक्त भइसकेका छन् ।

पछिल्लो २४ घण्टामा मात्र ८७० जना संक्रमणमुक्त भएको मन्त्रालयले जनाएको छ ।