समानुपातिक बन्दसूची : २९ जनाले लिए नाम फिर्ता, कांग्रेसका सबैभन्दा बढी

• असोज १७, २०७९ | ३९५ पटक पढिएको | सीमा संदेश

काठमाडौं । आसन्न निर्वाचनका लागि सामानुपातिकतर्फको बन्दसूचीमा नाम समावेश गरिएका २९ जनाले आफ्नो नाम फिर्ता लिएका छन् । उनीहरूले सोमबार निर्वाचन आयोगमा निवेदन दिएर नाम फिर्ता लिएका हुन् ।

आउँदो मंसिर ४ गते हुने प्रतिनिधिसभा र प्रदेशसभा सदस्य निर्वाचनका लागि दलहरूका तर्फबाट उमेदवारको बन्दसूची आयोगमा बुझाइएको थियो । सूचीबाट २९ जनाले नाम फिर्ता लिएका आयोगका उपन्यायाधिवक्ता गुरु वाग्लेले जानकारी दिए ।

उनका अनुसार त्यसरी नाम फिर्ता लिनेमा सबैभन्दा बढी नेपाली कांग्रेसका नेता छन् । प्रतिनिधिसभा र प्रदेशसभा दुवैतर्फ गरी कांग्रेसका नौजनाले नाम फिर्ता लिएका छन् । कांग्रेसका प्रतिनिधिसभातर्फका चारजनाले नाम फिर्ता लिएको उनले जानकारी दिए ।

यस्तै, जनता समाजवादी पार्टी (जसपा)का तर्फबाट पाँच, नेकपा (माओवादी केन्द्र)का तर्फबाट तीनजनाले बन्दसूचीबाट आफ्नो फिर्ता लिएका छन् । जसपाका प्रतिनिधिसभातर्फका तीनजनाले नाम फिर्ता लिएका हुन् । माओवादी केन्द्रका प्रतिनिधिसभातर्फका एकजनाले नाम फिर्ता लिएको उनले बताए ।

उनका अनुसार एकीकृत समाजवादी पार्टीका तर्फबाट प्रतिनिधिसभातर्फ एकसहित चारजनाले नाम फिर्ता लिएका छन् । नागरिक उन्मुक्ति पार्टीका तर्फबाट प्रदेश नम्बर–१ मा एक, पुनर्जागरण पार्टीका तर्फबाट वाग्मती प्रदेशमा पाँच र राष्ट्रिय नागरिक पार्टीका तर्फबाट वाग्मतीमा तीनजनाले नाम फिर्ता लिएका छन् ।

सबै पार्टीका तर्फबाट गरी प्रतिनिधिसभातर्फ नौ, प्रदेश–१ मा ६, मधेस प्रदेशमा दुई, वाग्मतीमा १०, गण्डकी प्रदेशमा एक र लुम्बिनी प्रदेशमा एकजनाले नाम फिर्ता लिएका उपन्यायाधिवक्ता वाग्लेले जानकारी दिए ।

नाम फिर्ता लिएका व्यक्तिका दललाई अब आयोगबाट जानकारी गराइने उनले बताए । “बन्दसूचीमा नामावली भएकाले फिर्ता लिएपछि यो–योले फिर्ता लिए भनेर जुन–जुन दलका तर्फबाट फिर्ता लिएका हुन्, सो दललाई फेरि उनीहरूको ठाउँमा अर्को मान्छे मिलाएर पठाउन पत्राचार गरिन्छ,” उनले  भने ।

आयोगले उक्त बन्दसूचीमा सूचीकृत कुनै उमेदवारले आफ्नो नाम फिर्ता लिन चाहेमा उनीहरूलाई सोमबार मध्याह्न १२ बजेसम्मको समय निर्धारण गरेको थियो ।