स्वास्थ्य बिमा सेवा ७७ जिल्ला र ७४८ स्थानीय तहमा विस्तार

• चैत २४, २०७९ | ४१५ पटक पढिएको | सीमा संदेश

काठमाडौं । स्वास्थ्य बिमा बोर्डको सेवा ७७ जिल्ला र ७४८ स्थानीय तहमा विस्तार भएको छ । बोर्डका कार्यकारी निर्देशक डा दामोदर बसौलाका अनुसार सेवा विस्तारमा बोर्डले विशेष ध्यान दिएको छ ।

स्वास्थ्य बिमाबारे आज आयोजित अन्तरक्रियामा निर्देशक बसौलाले बिमा सङ्ख्या विस्तार हुने क्रम बढ्दै गएको बताए । उनले बिमालाई प्रभावकारी ढङ्गले सञ्चालन गर्नको लागि सबै तह, निकाय जिम्मेवारी हुनुपर्नेमा जोड दिए । 

“आर्थिक अभावका कारण स्वास्थ्य उपचारबाट वञ्चित हुन नपरोस् भन्ने हेतुले सञ्चालन भइरहेको बिमा सबैको साझा रहेकाले यसको प्रवद्र्धन गर्न सबै जिम्मेवार हुनुपर्दछ,” उनले भने ।

काठमाडौं र ललितपुर महानगरपालिकामा प्रथम सेवा बिन्दुको अभावमा स्वास्थ्य बिमा कार्यक्रम लागु नभएकामा सम्बन्धित अधिकारीसँग छलफल भएको र अब छिट्टै सञ्चालनमा आउने उनले बताए । बिमा कार्यक्रमलाई प्रवद्र्धन गर्न बोर्डले ११ मध्ये १० कार्यविधि तयार पारी कार्यान्वयनमा लगेको उनको भनाइ छ । 

बोर्डका प्रवक्ता शम्भुप्रसाद ज्ञवालीले विसं २०७२ चैत २५ गतेदेखि सञ्चालनमा आएको बिमा कार्यक्रम यही चैत १५ सम्म कूल बिमित जनसङ्ख्या ६४ लाख ५४ हजार ७७२ र सूचीकृत सेवा प्रदायक स्वास्थ्य संस्था ४५६ रहेको बताए ।

गरिबी वर्गको सूचीकरण, नवीकरण नर्सिङ महाशाखाले गर्दै आएको र अति विपन्न परिवारलाई बिमाको दायराभित्र ल्याउन विपन्न नागरिक औषधि उपचार कार्यक्रमको निर्देशिका परिमार्जन गर्ने प्रक्रिया अगाडि बढेको बोर्डले जनाएको छ । बोर्डका अनुसार कूल बिमित जनसङ्ख्यामध्ये हाल सेवा लिनेको सङ्ख्या २८ लाख ९३ हजार ५७२ रहेका छन् ।

लक्षित वर्गको आबद्धतामा अति गरिब बीमित जनसङ्ख्या चार लाख ९८ हजार ७२२ र ज्येष्ठ नागरिक सात लाख ७७ हजार ८१६ रहेका छन् ।

एचआईभी एड्स सङ्क्रमित बिमित सङ्ख्या परिवारका सदस्यसहित ३२ हजार ५३०, अति अशक्त अपाङ्ग बिमित एक लाख २२ १५४, कुष्ठरोग सङ्क्रमित बिमित तीन हजार २४२, टीबी बिमित तीन हजार १७ जना र महिला स्वास्थ्य स्वयंसेविका बिमित एक लाख नौ हजार ६०७ जना रहेको बोर्डले जनाएको छ ।