क्रिकेटर दाजुभाइले एकैदिन विवाह गर्ने

• पुस १२, २०८१ | ५६२ पटक पढिएको | सीमा संदेश

नेपाल प्रिमियर लिग सम्पन्न भएपछि नेपाली राष्ट्रिय टोलीका खेलाडी दाजु भाइ आरिफ शेख र आसिफ शेखले एकैदिन विवाह गर्ने भएका छन् ।

अलराउण्डर आरिफले सबाना खातुनसँग र आसिफले आरजु अन्सारीसँग मुस्लिम परम्पराअनुसार एकैदिन विवाह गर्ने भएका छन् । यतिखेर होम टाउन वीरगञ्जमा रहेका आरिफ– आशिफ विवाहको निमन्त्रणा कार्ड धमाधम बाँडिरहेका छन् । कार्डमा उनीहरूको विवाहको रिसेप्सन पुस २० गते वीरगञ्जमा हुने भएको छ ।

भर्खरै सम्पन्न एनपीएलमा आसिफ जनकपुर बोल्ट्स र आरिफ सुदूरपश्चिम रोयल्सबाट खेलेका थिए । फाइनलमा दुइ दाजुभाइकै टिमको भिडन्त भएको थियो । तर आसिफको जनकपुरले उपाधि जित्दा आरिफको सुदूरपश्चिम उप–विजेता बनेको थियो । यता जनकपुर बोल्ट्सका टिम सदस्य आसिफ शेख र उपविजेता बन्ने सुदृरपश्चिम रोयल्स टिम सदस्य आरिफ शेखलाई उनीहरूको गृह जिल्ला पर्सामा नगदसहित प्रशंसापत्रले सम्मान गरिएको छ ।

हालै सम्पन्न भएको एनपिएलमा वीरगञ्ज महानगर–१२ स्थित मुर्ली नयाँटोलका शेख दाजुभाइ फरक–फरक टिमबाट सहभागी हुनु भएका थिए । वीरगञ्ज– १० कार्यालयद्वारा आयोजित कार्यक्रममा दुवै खेलाडीलाई जनही ५१ हजार रुपैयाँ नगदसहित प्रशंसापत्रले सम्मान गरिएको छ । वीरगञ्ज–१० का वडाध्यक्ष सुशील साह कानुले वीरगञ्जको प्रतिनिधित्व गर्दै दुवै खेलाडीले एनपिएलमा उत्कृष्ट प्रर्दशन गर्दै वीरगञ्जको नाम राख्न सफल भएको बताए ।