मधेश प्रदेशमा एमाले भित्र चरम गुटबन्दी ! महासेठभन्दा श्रेष्ठ पक्षभारी, पोखरेल र पौडेलको छायाँ

• पुस १९, २०८१ | ३७७ पटक पढिएको | सीमा संदेश

सत्तारुढ नेकपा एमालेको मधेश प्रदेशमा गुटबन्दी चरममा छ । संघीय गुटबन्दी अनुसार नै मधेश प्रदेशमा महासचिव शंकर पोखरेल समूह भारी देखिएको छ । विष्णु पौडेल गुटलाई धक्का लागिरहेको छ ।

मधेश प्रदेशमा पौडेल गुटको नेतृत्व सचिव रघुबीर महासेठले गरिरहेका छन् । पोखरेल गुटको कमाण्डर प्रदेश इञ्चार्ज लीलानाथ श्रेष्ठ रहेका छन् । पछिल्लो पटक पर्सा जिल्लाको सखुवा प्रसौनीमा एमालेबाट गाउँपालिका अध्यक्षमा निर्वाचित जसवंत यादवलाई पाखा लगाउन पोखरेल गुटमा रहेका सामान्य प्रशासन मन्त्री राजकुमार गुप्ताले जसपा नेपालबाट अध्यक्षमा पराजित भएका प्रदीप जयसवाललाई भित्र्याएका छन् ।

प्रदीप जयसवाल युवा तथा खेलकुद मन्त्री प्रमोद जयसवालका साख्यै भाई हुन् । स्वतन्त्र रुपमा प्रदेश सभामा निर्वाचित जयसवाल एमालेमा प्रवेश गर्दै शिक्षा तथा संस्कृति मन्त्री बनेका थिए । हाल उनी युवा तथा खेलकुद मन्त्री छन् । भ्रष्टाचारमा चुर्लुम्म डुबेका जयसवाललाई सरकारबाट हटाउन प्रदेश संसदीय दलका नेतामाथि दबाब बढिरहेको बेला भाईलाई पार्टी प्रवेश गराएर साख बचाउने प्रयास गरेका छन् ।

प्रधानमन्त्रीसमेत रहेका पार्टी अध्यक्ष केपी शर्मा ओलीलाई भारी माला लगाएर भाईलाई प्रवेश गराएपछि पालिका अध्यक्ष यादव बिच्किएका छन् । मन्त्री गुप्ता र जयसवालले आगामी दिनमा आफूलाई कमजोर बनाउन प्रदेश मन्त्रीले भाईलाई प्रवेश गराएको टिप्पणी गर्न थालेका छन् । उनी पनि महासचिव पोखरेल गुटमा नै रहेका छन् ।

मन्त्री गुप्ता पौडेल खेमा छाडेर पोखरेल खेमा ज्वाइन गरिसकेका छन् । महासेठले पत्नी जुली महतोलाई मन्त्रीका लागि अगाडि बढाएपछि गुप्तालाई विश्वासमा लिएर श्रेष्ठले मन्त्री बनाएको बताइन्छ । पर्सामा पौडेल पक्षधर जालिम मियाँ, बसरुद्दिनले खेमा परिवर्तन गरी पोखरेल पक्षमा खुलेका छन् । समग्रमा पर्सामा पोखरेल पक्ष बलियो देखिएको छ ।

मधेश प्रदेशमा पछिल्लो पटक पोखरेलको कार्यक्रममा सक्रियता बढेको छ । हरेक जिल्लामा उनको स्वागत भव्य हुन थालेको छ ।पौडेलको सक्रियता कम भएको छ । मधेश प्रदेशको ८ जिल्ला मध्ये ३ जिल्लामा नेतृत्वको चुनाव हुन सकेको छैन । चुनाव हुन नसकेको जिल्लाहरुमा सचिव महासेठको गृह जिल्ला धनुषा, इञ्चार्ज श्रेष्ठको गृह जिल्ला सिरहा र नेता सुमन प्याकुरेलको गृह जिल्ला सप्तरी रहेका छन् ।

तीनै जिल्लामा सदस्यतामै भारी विवाद देखिएको छ । जिल्ला निर्वाचनका लागि पटक पटक तयारी भए पनि हाल सम्म चुनाव हुन सकेको छैन । जिल्लामा निर्वाचन भए नेताहरुको विपक्षमा निर्णय हुन सक्ने आँकलन गरिएको छ । सचिवसमेत रहेका पूर्वउपप्रधान एवं भौतिक पूर्वाधार मन्त्री महासेठले धनुषाको निर्वाचन क्षेत्र नम्बर २ मा एमालेलाई बलियो बनाएका नेता उमाशंकर अरगडिया र संजीव झा ‘सुरज’लाई कमजोर बनाउन हालै गरेको सभामा कटु आलोचना गरेका थिए ।

क्षेत्र नम्बर २ मा कमजोर रहेका महासेठले अरगडिया र झाको समय गइसकेको अभिव्यक्ति दिएर पार्टीको विवादलाई छताछुल्ल बनाए । प्रदेश सरकारमा महासेठ समर्थकहरु प्रवेश पाएका छैनन् । श्रेष्ठ र प्याकुरेलको तालमेल प्रभावकारी भएको छ ।

मधेश प्रदेश संसदीय दलका नेता समेत रहेका भौतिक पूर्वाधार विकास मन्त्री सरोज कुमार यादवको भूमिकाले पोखरेल समूह सशक्त बनेको बताइन्छ । युवा नेता यादवले हालै महोत्तरी जिल्लाको रामगोपालपुर नगरपालिकामा पार्टी प्रवेश कार्यक्रममा महासचिव पोखरेललाई आमन्त्रण गरेर भव्य स्वागत गरे ।

सखुवा प्रसौनीमा भएको पार्टी प्रवेशको भन्दा विशाल रामगोपालपुरको कार्यक्रम रहेको थियो । यद्यपि दुवै कार्यक्रममा महासेठको उपस्थिति थिएन । मधेश प्रदेश सभामा एमाले सबै भन्दा ठूलो दल छ । प्रदेश सरकारको नेतृत्व जनमत पार्टीका सतीश कुमार सिंहले गरे पनि प्रभाव एमालेकै देखिन्छ ।

एमालेले नियन्त्रण सरकारमाथि बढी रहेकाले सत्ता गठबन्धनका साझेदार नेपाली कांग्रेस असन्तुष्ट देखिन्छ । एमालेको संगठनात्मक अवस्था कमजोर नभए पनि गुटबन्दीमा लागेका नेताहरुको कारण आगामी चुनावमा प्रतिकूल प्रभाव पर्नेमा तल्लो तहका नेताहरु चिन्तित देखिन्छन् । पोखरेल र पौडेलको छायाँ परेको एमाले मधेश प्रदेशमा ठूलो क्षति हुने देखिन्छ ।

चुनाव हुन नसकेको तीन जिल्लामा पुरानै कमिटीले काम चलाइरहेको छ । चुनावको चर्चा पनि हुन छाडेको छ । नेताहरु पनि चुनाव गराउने मनस्थितिमा छैनन् ।