कुलमान र बालेनबीचको भेटले राजनीतिक वृत्तमा तरंग !

• मंसिर १५, २०८२ | २९६ पटक पढिएको | सीमा संदेश

भर्खरै उज्यालो नेपाल पार्टी गठन गरेर प्रत्यक्ष राजनीतिमा होमिएका ऊर्जा, जलस्रोत तथा सिँचाइ मन्त्री कुलमान घिसिङ र काठमाडौं महानगरपालिकाका मेयर बालेन साहबीचको भेटघाटले राजनीतिक वृत्तमा नयाँ तरंग सिर्जना गरेको छ।

आइतबार मेयर बालेनकै निवासमा भएको यो भेटघाटलाई धेरैले सामान्य शिष्टाचार मात्र नभई भविष्यको राजनीतिक सहकार्यको बलियो संकेतका रूपमा लिएका छन्।

आइतबार सामाजिक सञ्जाल फेसबुकमार्फत तस्बिर सार्वजनिक गर्दै मन्त्री घिसिङले लेखेका थिए- ‘देश बनाउने अभियानमा हामी सँगै छौं।’

उनको यो स्टाटसले राजनीतिक दलहरूलाई झस्काएको विश्लेषण गर्न थालिएको छ।

जनस्तरमा उच्च छवि बनाएका यी दुई पात्र एकै ठाउँमा उभिनुलाई वैकल्पिक शक्तिको नयाँ अध्यायका रूपमा समेत हेर्न थालिएको छ।

लोडसेडिङ अन्त्य गरेर व्यवस्थापकीय क्षमता प्रमाणित गरेका घिसिङ र काठमाडौंको मुहार फेर्न तल्लीन बालेनको मिलनले आगामी निर्वाचन वा राजनीतिक एजेन्डामा ठूलो प्रभाव पार्न सक्ने अनुमान धेरैको छ।

बालेनको सचिवालयका अनुसार दुई नेताबीच देशको समसामयिक राजनीति र विकास निर्माणका साझा एजेन्डामा छलफल भएको थियो।

स्वतन्त्र हैसियतमा राजनीति सुरु गरेका बालेन र भर्खरै दल खोलेर सक्रिय भएका कुलमानको यो सहकार्य केवल विकास निर्माणमा मात्र सीमित हुन्छ वा चुनावी मोर्चाबन्दीसम्म पुग्छ ? त्यो भने समयले नै बताउनेछ। तर, यो तस्बिरले निराश जनतामा भने ‘केही हुन्छ कि’ भन्ने आशा भने पक्कै जगाएको छ।