मधेशी दलहरु निर्वाचनको पक्षमा

• पुस ३, २०८२ | २७५ पटक पढिएको | सीमा संदेश

कांग्रेस र एमालेले प्रतिनिधिसभा पुनस्र्थापनाको माग गर्दै आइरहेको बेला मधेस केन्द्रित दलहरु भने त्यसको विपक्षमा देखिएका छन् ।

उनीहरू जुनसुकै हालतमा निर्वाचन हुनुपर्ने पक्षमा रहेका छन् । जनता समाजवादी पार्टी (जसपा) नेपालका अध्यक्ष उपेन्द्र यादवले चुनावको तयारीमा लागेको सरकारलाई सहयोग गर्न आफूहरू तयार रहेको बताउंछन् । उनले भने ‘सरकारले चुनाव गराउँछ भने हामी भाग लिन तयार छौं । चुनावको घोषणा गरिसकेकाले संसद् पुनस्र्थापनाको कुरा गर्न उठाउनु ठीक होइन ।’ जेनजी पुस्ताले गरेको आन्दोलनकै कारण २०८४ को चुनाव २०८२ मा हुन लागेकाले यसको विकल्प नभएको उनको भनाइ छ ।

यस्तै जनमत पार्टीका अध्यक्ष डा. सीके राउतले पनि आफ्नो पार्टी संसद् पुनस्र्थापनाको पक्षमा नरहेको बताउंछन् । जेनजी आन्दोलनको सम्मान गर्दै आफ्नो पार्टी चुनावका लागि तयार रहेको उनको भनाइ छ । ‘जेनजी आन्दोलनपछि संसद् विघटन भइसकेको छ र चुनावको घोषणा भइसकेको छ, अब पछाडि नफर्की नयाँ जनादेशका लागि अगाडि बढ्नुपर्छ,’ उनले भने । विघटित प्रतिनिधिसभामा नरहेको राष्ट्रिय मुक्ति पार्टीका अध्यक्ष राजेन्द्र महतोले संसद् पुनस्र्थापनाको मागले जेनजी आन्दोलनको अपमान गर्ने बताए ।

‘कांग्रेस–एमालेले पुनः लुट मचाउन, भ्रष्टाचार गर्नका लागि संसद् पुनस्र्थापनामा जोड दिएका हुन् । नयाँ जनादेशमा जानुको विकल्प छैन, अब कसैले पनि आन्दोलनको मानमर्दन गर्न पाइँदैन,’ उनले भने ।’ लोकतान्त्रिक समाजवादी पार्टीका उपाध्यक्ष लक्ष्मणलाल कर्णले पनि अबको विकल्प चुनाव नै भएको बताएका छन् । उनले भने ‘चुनाव हुन नसक्ने अवस्थामा मात्रै विकल्पको रूपमा संसद् पुनस्र्थापनामा जानुपर्ने हो, सरकारले चुनावको मिति घोषणा गरिसकेकाले सबै दल त्यसमै केन्द्रित हुनुपर्ने हो ।’