रेशम चौधरीलाई राहत

• असोज ७, २०८३ | ३४ पटक पढिएको | सीमा संदेश

नागरिक उन्मुक्ति पार्टीका संस्थापक नेता रेशम चौधरीलाई राष्ट्रपति रामचन्द्र पौडेलले दिएको कैद माफी मिनाहा सर्वोच्च अदालतले सदर गरेको छ ।

न्यायाधीश शारंगा सुवेदी र श्रीकान्त पौडेलको इजलासले चौधरीको माफीविरुद्ध शारदा कडायतले दायर गरेको रिट खारेज गर्दै राष्ट्रपतिको निर्णयलाई सदर गरेको छ । संविधानको धारा २७६ तथा मुलुकी फौजदारी कार्यविधि संहिताअनुसार प्रक्रिया अघि बढाएर २०८० जेठमा चौधरीलाई माफी दिइएको थियो । २०७२ भदौ ७ गते टिकापुरमा भएको हिंसात्मक घटनामा एक नाबालकसहित आठ सुरक्षाकर्मीको मृत्यु भएको थियो ।

सो घटनामा चौधरीलाई जिल्ला र उच्च अदालतले जन्मकैदको सजाय सुनाएका थिए, जसलाई सर्वोच्च अदालतले पनि सदर गरेको थियो । नेता चौधरी २०७४ फागुनदेखि २०८० जेठसम्म थुनामा नै थिए । अदालतले तोकेको २० वर्षको कैद सजायमध्ये माफी मिनाहाबाट करिब १५ वर्ष सजाय मिनाहा भएको थियो । सो विरुद्ध कडायतले रिट दिएकी थिइन् । सो रिट खारेज गर्दै सर्वोच्च अदालतले रेशमको कैद मिनाहा सदर गरेको छ ।