जेन–जी आन्दोलनमा जेलबाट भागेका कैदीबन्दी पक्राउ

• कार्तिक १६, २०८३ | ७५ पटक पढिएको | सीमा संदेश

जेन–जी आन्दोलनको मौका छोपेर काठमाडौंको सुन्धारास्थित केन्द्रीय कारागारबाट फरार भएका सिरहाको धनगढीमाई-१४ का करिब ३८ वर्षीय झरेन्द्र ज्यू ठकुरीलाई प्रहरीले पक्राउ गरेको छ ।

लागूऔषध ब्राउनसुगर सम्बन्धी मुद्दामा एक लाख रुपैयाँ जरिवानासहित १५ वर्ष कैद सजाय सुनाइएका फरार ठकुरीलाई शनिबार दिउँसो सिरहाबाट पक्राउ गरिएकाे हाे ।

लागूऔषध ब्राउनसुगर १५८ ग्राम ८०० मिलिग्रामसहित पक्राउ गरी मुद्दा चलाइएका ठकुरी अदालतको फैसलापछि केन्द्रीय कारागारमा रहेका बेला भएको आन्दोलनको क्रममा फरार भएको सिरहा प्रहरीका सूचना अधिकारी प्रहरी नायव उपरीक्षक रमेशबहादुर पालले जानकारी दिए ।

उनका अनुसार फरार ठकुरी गाउँघरमै लुकीछिपी बस्दै आएको गोप्य सूचनाको आधारमा जिल्ला प्रहरी र गोलबजारस्थित लागूऔषध नियन्त्रण ब्यूरोको संयुक्त टोलीले पक्राउ गरी सिरहा कारागारमा दाखिला गरेको छ।