१ करोड ९ लाख अवैध भारतीय रुपैयाँसहित दुई जना नेपालमा पक्राउ "२०७७ बैशाख २३ गते"

• वैशाख २३, २०७७ | २७३ पटक पढिएको |

मोरङको विराटनगरमा रहेको रानी नाकाबाट प्रहरीले १ करोड ९ लाख भारतीय रुपैयाँसहित दुई जनालाई सशस्त्र प्रहरीले पक्राउ गरेको छ । खाली ट्रकमा भारतबाट नेपाल तर्फ आएको अवस्थामा त्यति रकम बरामद गरिएको हो ।

विराटनगरमा एकीकृत भन्सार जाँच चौकी विराटनगर परिसरबाट एक करोड नौ लाख ७९ हजार ५ सय भारतीय रुपैयाँसहित दुई जना भारतीय नगरिकलाई पक्राउ गरिएको सशस्त्र प्रहरी उपरीक्षक नेत्र कार्कीले जानकारी दिनुभयो । भारतबाट प्रवेश गरेको डब्लूबी ७३ ई ७६३५ नम्बरको खाली गाडी जाँच गर्ने क्रममा बोराभित्र राखेको अवस्थामा रकम बरामद भएको प्रहरीले जनाएको छ ।

खाली गाडीमा गुट्खाको खोलले बेरेर लुकाएर ल्याइएको अवस्थामा रकम फेला परेको थियो । सशस्त्र प्रहरीले पक्राउ परेका दुई जनामा गाडीका चालक दार्जिलिङका २४ वर्षीय रवीन्द्र शर्मा र भारतकै महजपुर जिल्लाका १८ वर्षीय पप्पु कुमार रहेका छन् ।

नेपाल प्रवेश गराइएको रकमको बारेमा केही नखुलेको प्रहरीले जनाएको छ ।