सामाजिक सञ्जालमा गहना र नगद प्रदर्शन गर्ने युट्युबरको घरमा एक करोडको चोरी

• असोज १२, २०८३ | ३७ पटक पढिएको | सीमा संदेश

भारत, तमिलनाडुको कन्याकुमारीकी युट्युबर तथा इन्फ्लुएन्सर मधुमिताको घरबाट करिब एक करोड भारतीय रुपैयाँ बराबरको सुन, हीराका गहना र नगद चोरी भएको छ।

भारतीय सञ्चारमाध्यमका अनुसार चार लाख ५० हजारभन्दा बढी फलोअर्स भएकी मधुमिताले इन्स्टाग्राम रिल्स र तस्बिरमार्फत आफ्नो विलासी जीवनशैली देखाउँदै आएकी छन्। उनले नियमित रूपमा सुनका गहना, नगदका बिटा र परिवारसँग सम्बन्धित गतिविधिका भिडियो तथा तस्बिर पोस्ट गर्ने गरेकी थिइन्।

जानकारी अनुसार बिहीबार मधुमिता र उनका परिवारका सदस्य किनमेलका लागि घरबाट बाहिर गएका थिए। त्यही मौका छोपेर चोरहरू नागरकोइलस्थित उनको घरमा प्रवेश गरेका थिए। परिवार घर फर्किएपछि लकर खोलिएको र बहुमूल्य सामान हराएको थाहा पाएका हुन्।

प्रहरीका अनुसार घरबाट करिब १२० सोभरिन सुन तथा हीराका गहना र ५० हजार भारतीय रुपैयाँ नगद चोरी भएको छ। चोरी भएका सामानको कुल मूल्य करिब एक करोड भारतीय रुपैयाँ रहेको बताइएको छ।

मधुमिताका पुराना पोस्ट र रिल्समा उनले गहना तथा नगद देखाएको र परिवारले नियमित रूपमा सुन खरिद गर्ने गरेको सामग्री पनि देख्न सकिन्छ। एउटा भिडियोमा उनले आफ्नो सानो बच्चामाथि ५०० रुपैयाँका नोट बर्साएको देखिन्छ। प्रहरीले यस्ता पोस्ट र रिल्समार्फत चोरहरूले परिवार घरमा नभएको समय पत्ता लगाएका थिए कि थिएनन् भन्नेबारे अनुसन्धान गरिरहेको छ।

उनले यसअघि आफ्नो बहुमूल्य सामान कसरी सुरक्षित राख्ने भन्नेबारे पनि एउटा रिल बनाएकी थिइन्। चोरीपछि उक्त रिल फेरि चर्चामा आएको छ।

घटनाको अनुसन्धानका लागि प्रहरीले पाँचवटा विशेष टोली गठन गरेको छ। प्रहरीले सामाजिक सञ्जालका पोस्टसँगै स्थानीय सीसीटीभी फुटेज र अन्य विवरण पनि जाँच गरिरहेको बताएको छ।

घटनापछि सामाजिक सञ्जालमा विभिन्न प्रतिक्रिया आएका छन्। भारतका उद्योगपति हर्ष गोयन्काले चोरी गलत भएको भन्दै मधुमिताप्रति सहानुभूति राख्ने कि नराख्ने भन्ने प्रश्न गरेका छन्।

केही प्रयोगकर्ताले सामाजिक सञ्जालमा अत्यधिक सम्पत्ति देखाउनु जोखिमपूर्ण हुन सक्ने बताएका छन् भने केहीले आफ्नो सम्पत्ति देखाउनु व्यक्तिगत विषय भएको बताएका छन्।

प्रहरीले चोरहरूको खोजी जारी राखेको जानकारी दिएको छ।