लकडाउन उल्लंघन गरेका प्रदेश २ का सांसद यादवको गाडी नियन्त्रणमा

• जेठ २, २०७७ | २९० पटक पढिएको |

देशैभर कोरोना संक्रमितको संख्या बढ्न थालेपछि प्रहरीले प्रदेश २ मा लकडाउनलाई कडा बनाएको छ । सवारी साधनहरु निर्वाधरुपमा हिँड्न थालेपछि प्रहरीले पछिल्लो दुई दिनदेखि लकडाउनमा कडाइ गरेको हो ।

यसैबीच प्रहरीले बिनापास गाडी चलाएको भन्दै प्रदेश सांसद अशोक यादवको गाडी नियन्त्रणमा लिएको छ । जनकपुरको भानुचोक नजिकबाट प्रहरीले प्रदेश सांसद यादवको गाडी नियन्त्रणमा लिएको धनुषाका प्रमुख जिल्ला अधिकारी कोषहरि निरौलाले जानकारी दिए ।

प्रहरीले चेकजाँच गर्दा पास देखाउन नसकेपछि गाडीलाई नियन्त्रणमा लिइएको सीडीओ निरौलाले बताए । ‘लकडाउन उल्लंघन गरेर बिनापास सञ्चालन भएका सरकारी गाडीसमेत प्रहरीले नियन्त्रणमा लिएको छ । गाडीमा उहाँ हुनुहुन्थेन। प्रहरीले चालकलाई पास देखाउन भन्यो । पास नदेखाएपछि नियन्त्रणमा लिइएको हो ।’, उनले भने ।

कोरोना संक्रमणको जोखिम बढ्दै जाँदा लकडाउनलाई प्रभावकारी बनाउन कडाइ गर्नुको विकल्प नरहेको निरौलाले बताए । लकडाउन उल्लंघन गरी सञ्चालन भइरहेका सरकारी गाडीसहित सयभन्दा बढी सवारी साधन प्रहरीले शुक्रबार जनकपुरबाट नियन्त्रणमा लिएको जिल्ला प्रहरी कार्यालय धनुषाका प्रवक्ता डीएसपी रामेश्वर कार्कीले जानकारी दिए ।

यसैगरी सरकारी तथा निजी गरी प्रदेश २ मा शुक्रबार साँझसम्म लकडाउन उल्लंघन गरेर हिँड्ने १८२ सवारी साधन नियन्त्रणमा लिइएको प्रदेश प्रहरी कार्यालय जनकपुरले जनाएको छ ।