मधेसमा एमाले बन्दैछ पहिलो दल, २ महिलासहित सात सीट जितेर अग्रस्थानमा

• मंसिर ९, २०७९ | २९२ पटक पढिएको | सीमा संदेश

सिरहा । मधेसमा कमजोर मानिएको नेकपा एमालेले यसपटकको चुनावमा सरप्राइज दिएको छ । मधेस प्रदेशका ८ जिल्लाका ३२ निर्वाचन क्षेत्रमध्ये २३ ठाउँका परिणाम आइसक्दा ७ सीट जितेर एमाले पहिलो दल बन्ने दिशामा अग्रसर भएको छ ।

प्रदेश सभामा पनि एमालेले उल्लेख्य सफलता निकालेको छ । यसअघि २ सीट जितेको एमालेले यसपटक मधेसमा ५ सीट थपेको छ । गठबन्धनसँग भिडेको एमालेलाई मधेसले यो चुनावमा राहत दिएको छ ।

कांग्रेसले सप्तरी ३, धनुषा २, रौतहट ४ र पर्सा २ मा जित निकालिसकेको छ । एमालेले सिराहा १ र ३, धनुषा ३, सर्लाही ३, बारा १ र ३ तथा पर्सा ३ मा जित निकालेको छ । जसपाले सप्तरी १, सिराहा ४ र पर्सा १ मा जितेको छ भने लोसपाले सर्लाही १ र महोत्तरी २ मा जित निकालेको छ । जनमत पार्टीले सप्तरी २ मा जित्दा नेकपा एसले रौतहट १ र बारा ४ मा जितेको छ । त्यस्तै, कांग्रेसबाट बागी बनेर स्वतन्त्र उठेका अमरेश कुमार सिंह सर्लाहीमा बिजयी हुँदा एमाले छाडेर स्वतन्त्र उठेका प्रभु साह र किरण साहले क्रमशः रौतहट ३ र २ मा जित निकालेका छन् ।

मधेसमा अहिलेसम्म सबैभन्दा धेरै सीट जितेको एमालेले टिकट दिएका दुई प्रभावशाली महिलाले शानदार जित निकालेका छन् । धनुषा ३ मा जुलिकुमारी महतो र बारा ३ मा ज्वाला कुमारी साहले चुनाव जितेका छन् । सिराहामा एमालेबाट क्षेत्र नम्बर १ मा रामशंकर यादव र ३ मा लिलानाथ श्रेष्ठले जितेका छन् ।

सर्लाही ३ बाट एमालेका हरि उप्रेतीले चुनाव जित्दा बारा १ मा अच्युत मैनाली र पर्सा ३ मा राज कुमार गुप्ता विजयी भएका छन् । अब गणना भइरहेकामध्ये मधेसमा एमालेको अग्रता छैन । धनुषा ४ मा रघुवीर महासेठ र महोत्तरी १ मा लक्ष्मी महतो केही मतले पछि परेका छन् ।

कांग्रेसबाट हालसम्म सप्तरी ३ मा दिनेश यादव, धनुषा २ मा रामकृष्ण यादव, रौतहट ४ मा देव तिमल्सिना र पर्सा २ मा अजय चौरसियाले चुनाव जितेका छन् । नेकपा एसबाट माधव कुमार नेपाल रौतहट १ र किसान श्रेष्ठ बारा ४ बाट चुनाव जितेका छन् भने सीके राउतले सप्तरी २ बाट जितेका छन् ।

लोसपाबाट हालसम्म शरदसिंह भण्डारी महोत्तरी २ र राम प्रकाश चौधरी सर्लाही १ बाट जितेका छन् भन् जसपाबाट सप्तरी १ मा नवलकिशोर साह र सिराहा ४ बाट बिरेन्द्र महतोले जितेका छन् । अब कांग्रेसले सप्तरी ४, धनुषा ४, महोत्तरी ४ मा अग्रता लिइरहेको छ भने माओवादीले महोत्तरी १, सर्लाही २ र बारा २ मा अग्रता लिइरहेको छ ।

माओवादीले अहिलेसम्म एक सीट पनि जितेको छैन । जसपाले सिराहा २, धनुषा १ र महोत्तरी ३ मा अग्रता लिइरहेको छ । कांग्रेसले अग्रता लिइरहेका सबै सीट जिते पनि एमालेभन्दा ठूलो बन्न नसक्ने देखिएको छ भने अन्यत्र अग्रता लिने अवस्था छैन ।