अझै कति दिन पर्दैन पानी ? समय अगावै कम्तीमा चार डिग्री सेल्सियस तापक्रम उच्च

फागुन ११, २०७९ | ७३१ पटक पढिएको | सीमा संदेश

काठमाडौं । अझै कम्तीमा तीन दिन पानी नपर्ने भएको छ । केही क्षेत्रमा छिटपुट वर्षा भए पनि देशभर ठूलो पानी पर्ने सम्भावना कम्तीमा तीन दिन नरहेको मौसमविद् राजु प्रधानाङ बताउँछन् ।

“जल तथा मौसम विज्ञान विभागसँग रहको मौसमी प्रणाली अध्ययन गर्ने सम्यन्त्रले तीन दिनसम्मको मात्रै मौसम कस्तो रहन्छ भनेर अध्ययन गर्न सक्छ,” राजु भन्छन्, “त्यसभन्दा धेरै दिनको मौसमको अध्ययन नमिल्न पनि सक्छ । त्यसैले हामी तीन दिनभन्दा धेरैको मौसम यस्तो हुन्छ भनेर बताउन सक्दैनौँ । यदि, बतायौं भने पनि त्यो नमिल्न सक्छ ।”

यो वर्षको हिउँदमा पश्चिम नेपालका केही क्षेत्रमा छिटपुट मात्रामा वर्षा भए पनि अन्य भागमा वर्षा नभएको उनी बताउँछन् । वर्षा नहुँदा चाँडै तापक्रम पनि वृद्धि भएको उनको भनाइ छ । “अन्य वर्षको तुलनामा तीनदेखि चार डिग्री सेल्यिससम्म तापक्रम यो वर्ष समय अगाडि नै वृद्धि भएको छ,” मौसमविद् राजु भन्छन्, “समयमा पानी नपर्दा हिउँदे बालीमा त नकारात्मक प्रभाव पर्यो नै वातावरण प्रदूषण पनि बढेको छ । र, समयभन्दा अगाडि नै गर्मी पनि सुरु भएको छ ।”

पानी पर्दा हावामा रहेका धुलो र धुवाँ पानीले जमीनमा झार्ने र वायुमण्डल सफा हुने उनी बताउँछन् । तर, पानी नै नपरे पछि हावामा धुलो र धुवाँको कण हुँदा वायु प्रदूषण बढेको उनको भनाइ छ ।

पश्चिमी वायु सक्रिय सक्रिय नहुँदा पानी पर्न नसकेको हो । पश्चिमी वायुको आंशिक प्रभाव रहे पनि त्यो आवश्यक मात्रामा सक्रिय नहुँदा पानी पर्न नसकेको राजुको भनाइ छ ।