सिरहाका होटलहरुमा अनैतिक गतिविधि बढदै, मिर्चैयाका दुई होटलबाट ६ जना पक्राउ

• पुस १३, २०८० | ४६५ पटक पढिएको | सीमा संदेश

सिरहा, १३ पौष । सिरहाका होटल तथा लजहरुमा अनैतिक गतिविधि बढेका छन् । सिरहा सदरमुकाम, मिर्चैया, गोलबजार, लहान लगायत बजारमा होटल तथा लजहरुमा अनैतिक गतिविधि भईरहेका छन् । प्रशासनको गतिविधि सुस्त भएको कारण अनैतिक गतिविधि बढेको स्थानीयहरुका गुनासो रहेका छन् ।

यता सिरहाको मिर्चैयामा प्रहरीले बुधबार घटेको घटनापछि होटल लगातार छापा मार्दा दुई होटलबाट ६ जना पक्राउ परेका छन् । होटलहरूमा अनैतिक गतिविधि बढेको जनगुनासो बढेपछि मिर्चैया प्रहरीले अनुसन्धान तिब्र बनाएको हो । प्रहरीले बुधबार र विहिबार लगातार होटलहरूमा छापा र निगरानी बढाएको हो।

छापाका क्रममा प्रहरीले मिर्चैयास्थित कटारी चोकमा सञ्चालित होटलहरूबाट ६ जनालाई पक्राउ गरेको छ । ओखलढुंगे होटलबाट विहिबार दिउँसो होटल सञ्चालक र एक महिला गरी दुई जना र एभरेष्ट होटलबाट राति २ पुरुष र २ महिलालाई पक्राउ गरिएको प्रहरीले जनाएको छ।

उनीहरूमाथि अभद्र व्यवहार मुद्दा दर्ता गरी कारवाही प्रक्रिया अगाडी बढाइएको इलाका प्रहरी कार्यालय मिर्चैयाका डीएसपी जितेन्द्र बस्नेतले स्पेस समाचारलाई जानकारी दिए । होटलहरूमा निगरानी बढाएको र गलत गतिविधिमा संलग्न रहेकाहरूलाई कानुनी कारवाही हुने पनि उनले बताए ।