लिङदेनको टिप्पणीले रेखा थापा क्रुद्ध, अमेरिकाबाटै फर्काइन् जवाफ

• माघ १४, २०८० | ४२२ पटक पढिएको | सीमा संदेश

काठमाडौं । आफ्नो अमेरिका यात्रालाई लिएर राप्रपा अध्यक्ष राजेन्द्र लिङ्देनले गरेको टिप्पणीले अभिनेत्री रेखा थापा आक्रोशित बनेकी छन् । उनले अमेरिकाबाटै सामाजिक सञ्जालमार्फत लिङ्देनलाई जवाफ दिएकी छन् ।

स्मरणीय छ कि रेखा राप्रपाकी केन्द्रीय कार्यसम्पादन समिति सदस्य हुन् । उनी पार्टीकोमहाधिवेशनमा लिङदेनकै प्यानलबाट महामन्त्रीमा उठेर पराजित बनेकी थिइन् ।

लिङ्देनले हिजो एक सार्वजनिक कार्यक्रममा रेखाप्रति घुमाउरो टिप्पणी गरेका थिए । देशको दुरावस्था चित्रण गर्ने क्रममा उनले ‘एक कलाकार आफ्नो सन्तानलाई नेपाली बनाउन नचाहेर अमेरिका पुगेको’ बताएका थिए । यसलाई आफूप्रतिको कटाक्षका रूपमा बुझेर रेखा आक्रोशित बनेकी हुन् ।

राप्रपा अध्यक्ष लिङदेनकी छोरी अमेरिकामा छिन् । उनी उच्च शिक्षा अध्ययनका लागि एक वर्षअघि गएको निकट स्रोतले बतायो ।

‘उहाँ पढ्नका लागि मात्रै जानुभएको हो, अध्ययन सक्नेवित्तिकै फर्किनुहुन्छ,’ लिङदेननिकट स्रोतले भन्यो । लिङदेनका दुई छोरा नेपालमै अध्ययनरत छन् ।

रेखाले पार्टीलाई जानकारी नदिई अमेरिका गएको तथा अहिले अध्यक्षविरूद्ध गरेको टिप्पणीलाई गम्भीर रूपमा लिइने पार्टीका एक नेताले बताए ।

‘अध्यक्षले देशको अवस्था र प्रवृत्तिको चित्रण गर्दा उहाँको उदाहरण दिनुभएको थियो, तर उहाँले व्यक्तिगतरूपमा लिएर अध्यक्षमाथि नै खनिनु ठीक भएन’ स्रोतले भन्यो ।