गृहमन्त्रीको पुतला दहन

• पुस ९, २०८१ | ४०६ पटक पढिएको | सीमा संदेश

नेपाल प्रिमियर लिग (एनपीएल)को समाप्तिपछि काठमाडौंको कीर्तिपुर मैदानमा मधेशी युवाहरुलाई लक्षित गर्दै कुटपिट गरेको विरोधमा जनकपुरधाममा गृहमन्त्रीको पुतला दहन गरिएको छ ।

एनपीएलको फाइनल खेलपछि काठमाडौंमा विजय उत्सव मनाइरहेका जनकपुर बोल्टस् समर्थक मधेशी समुदायलाई लक्षित गरी केही युवाले अपमानजनक शब्द प्रयोग गर्दै कुटपिटसमेत गरेको घटनाप्रति राज्य गम्भीर नभएको भन्दै सोमबार जनकपुरधाममा मधेशी युवाहरुले गृहमन्त्री रमेश लेखकको पुतला जलाएका हुन् । त्यस्ता गतिविधि गर्ने व्यक्तिहरुको पहिचान गरी कारबाही गर्न राज्यले उदासीनता देखाएको र नेपालका शासक तथा राज्य कति नश्लीय एवम् रंगभेदी छ भन्ने कुराको प्रमाण यस घटनाले पुष्टि गरेको युवाहरुको भनाई छ ।

युवाहरुले संसद्, सरकार, अदालत, सेना, प्रहरी, कर्मचारी र शासकवर्ग सबै नश्लीय भएको र त्यहाँ एउटा पार्टीले मात्र संघर्ष गर्दैमा नपुग्ने बताए ।स्थानीय भानुचोकमा आयोजित विरोध प्रदर्शन कार्यक्रममा विभिन्न राजनीतिक दलमा आवद्ध नेता कार्यकर्ताहरुको पनि सहभागिता रहेको थियो ।

गत शनिबार सुदूरपश्चिम रोयल्स र जनकपुर बोल्ट्सबीचको फाइनल खेल सकिएपछि हुलदंगा गरेको आरोपमा प्रहरीले दुई जनालाई पक्राउ गरिसकेको छ । पक्राउ पर्नेमा डोटीको आदर्श गाउँपालिका घर भएका २१ वर्षीय अशोक साउद र दिपायल सिलगढी नगरपालिका घर भएका १८ वर्षीय गणेश साउद छन् ।