पक्राउ पूर्जी जारी भएपछि ठेकेदार महतो फरार

• चैत ३१, २०८१ | ४०९ पटक पढिएको | सीमा संदेश

ठेकेदार समेत रहेका जनता समाजवादी पार्टी नेपालका आर्थिक विभागका संयोजक बलराम महतोविरुद्ध पक्राउ पूर्जी जारी भएपछि फरार भएका छन् ।

जिल्ला प्रहरी कार्यालय धनुषाले व्यवासयी बलराम महतोविरुद्ध पक्राउ पूर्जी जारी गरेको छ । जनकपुरधाम उप– महानगरपालिका–४ का सन्तोषकुमार यादवको जाहेरीको आधारमा उनीविरुद्ध पक्राउ पूर्जी जारी भएको छ ।

विगतमा यादव ठेकेदार महतोसित ठेक्काको काम गरेका थिए । सो क्रममा यादवले महतोलाई स– प्रमाण २५ करोड भन्दा बढी रुपैयाँको कारोबार गरेका थिए । तर महतोले उनको रुपैयाँ फिर्ता गर्न तयार भएनन् ।

धनुषाको सबैला नगरपालिका–१२ घर भइ हाल जनकपुरधाम उपमहानगरपालिका–१३ बस्ने रमण कन्सट्रक्सन प्रालिका सञ्चालक ६२ वर्षीय महतोविरुद्ध बैकिंग सम्बन्धी कसुर मुद्दाको क्रममा पक्राउ गर्नका लागि सूचना जारी गरेपछि उनी फरार छन् । जिल्ला प्रहरी कार्यालय धनुषाको स्रोतले जनाए अनुसार पक्राउ पुर्जी जारी भएपछि महतो सम्पर्कविहीन भएका छन् ।

सन्तोष र बलरामबीच विगतमा गरिएको कारोबारमा करिब २५ करोड रुपैयाँको लेनदेन भएको थियो । तर व्यवसायी महतोले ८ करोड रुपैयाँ मात्रै दिने भएपछि उनीविरुद्ध मुद्दा नै दायर गरेका थिए । सो मुद्दामा उनलाई दोषी ठहर गरेपछि रकम नदिइकनै उनी फरार भएको बताइएको छ । २०८१ चैत २१ ग्ते उच्च अदालत जनकपुरले समेत उनलाई दोषी ठहर गरेको छ ।

दोषी ठहर भएदेखि व्यवसायी महतोको मोवाइल स्वीच बन्द गरी फरार छन् । उनलाई पक्राउ गर्न प्रहरी परिचालन गरिए पनि यस बिषयमा धनुषाका एसपी भूवनेश्वर तिवारीले आफूलाई जानकारी नभएको बताएका छन् । व्यवसायी महतोविरुद्ध शुक्रबार नै पक्राउ पूर्जी जारी भएको छ । उनी केही दिन पूर्व काठमाण्डुमा रहेका थिए । उनी निकटका एकजना नेताले जनाए अनुसार महतो काठमाण्डुमा नै रहेका छन् । उनलाई पक्राउ गर्न काठमाण्डु प्रहरीसित समन्वय भइरहेको जिल्ला प्रहरी कार्यालय धनुषा स्रोतले जनाएका छन् ।

महतोको कारण यादवको धेरै जग्गा समेत विक्री भइसकेको बताइएको छ । ठेक्कामा लगानीको नाममा यादवसित उनले पटक पटक रुपैयाँ लिने गरेको तर फिर्ता नगरेको बताइन्छ । रकम फिर्ता गर्न लामो समय सम्म गरेको प्रयास असफल भएपछि अदालतबाट रकम असुलीको प्रक्रियामा पुगेको बताइन्छ । दुई तहको अदालतले नै महतोलाई दोषी ठहर गर्दै रकम उपलब्ध गराउन आदेश जारी गरेको छ ।