धनुषाको कमला नगरपालिका मस्जिद विवाद : तीन जना पक्राउ

• पुस २१, २०८२ | २७३ पटक पढिएको | सीमा संदेश

सामाजिक सञ्जाल टिकटकमार्फत धार्मिक असहिष्णुता फैलाएर सामाजिक सद्भावमा खलल पु¥याउने प्रयास गरेको भन्दै जिल्ला प्रहरी कार्यालय धनुषाले तीनजनालाई पक्राउ गरेको छ ।

धनुषाको कमला नगरपालिका–६ का १९ वर्षीय आशिष अन्सारी, २२ वर्षीय अमात अन्सारी र २५ वर्षीय रामप्रताप साहलाई नियन्त्रणमा लिएको जिल्ला प्रहरी कार्यालय धनुषाले जनाएको छ । टिकटकमा विभिन्न किसिमका आपत्तिजनक शब्द प्रयोग गरी समुदाय लक्षित गालीगलौज गरिएको भिडियो पोष्ट गरिएको पाइएपछि सो कार्यमा संलग्न रहेको पाइएपछि पक्राउ गरिएको जिप्रका धनुषाले जनाएको छ ।

उनीहरूमाथि मुलुकी अपराध संहिता, २०७४ को दफा १५६ बमोजिम धर्मसम्बन्धी कसुरमा मुद्दा दायर गरी जिल्ला अदालत धनुषाबाट म्याद थप गरी अनुसन्धान भइरहेको धनुषा प्रहरीका डिएसपी गणेशबहादुर बमले जानकारी दिए । यसैबीच टिकटकमा भिडियो बनाएर पोष्ट गरिएको विषयलाई लिएर मिति पुस १९ गते कमला नगरपालिका–६ स्थित सिंग्याही मडानस्थित मुस्लिम टोलमा रहेको मस्जिदमा तोडफोड भएको घटनामा पनि प्रहरीले अनुसन्धान थालेको उनले बताए ।

उक्त घटनामा संलग्न रहेको आरोपमा स्थानीय २५ वर्षीय कपिल भनिने रामप्रताप साहलाई पक्राउ गरिएको डिएसपी बमले बताए । तोडफोडका क्रममा मस्जिदमा रहेका कागजातहरू निकालेर धार्मिक ग्रन्थसहित जलाएको साहमाथि आरोप छ । उनीमाथि पनि धर्मसम्बन्धी कसुर अन्तर्गत मुद्दा दर्ता गरी अनुसन्धान भइरहेको छ भने घटनामा संलग्न अन्य व्यक्तिहरूको खोजी कार्य जारी रहेको धनुषा प्रहरीले जनाएको छ ।

टिकटक, फेसबुक, ह्वाट्सएपलगायत सामाजिक सञ्जालमा कसैको धार्मिक आस्थामाथि ठेस पुग्ने किसिमका स्टाटस, अडियो वा भिडियो पोष्ट गर्ने, लाइक, सेयर तथा कमेन्ट गर्ने कार्य कानुन विपरीत भएको स्पष्ट पार्दै यस्ता गतिविधिमा संलग्न जो– कोहीलाई प्रचलित कानुनअनुसार कडा कारबाही गरिने चेतावनी समेत धनुषा प्रहरीले दिएको छ ।

सामाजिक सद्भाव र शान्ति कायम राख्न राजनीतिक दल, जनप्रतिनिधि, सञ्चारकर्मी, धार्मिक अगुवा, अधिकारकर्मी, नागरिक समाज तथा सर्वसाधारणलाई जिम्मेवार भूमिका निर्वाह गर्न जिप्रका धनुषाले अपिल समेत गरेको छ ।