नवराजपुरमा सशस्त्र प्रहरीद्वारा करिब ४० लाख बराबरको ओखरसहित ट्रक नियन्त्रणमा

• जेठ ३, २०८३ | २१५ पटक पढिएको | सीमा संदेश

सिरहा । सिरहाको नवराजपुर गाउँपालिका क्षेत्रमा सशस्त्र प्रहरीले करिब ४० लाख रुपैयाँ बराबरको ओखर, टुथपेस्ट तथा फेर एण्ड लब्लीसहित ट्रक नियन्त्रणमा लिएको छ ।

विशेष सूचनाका आधारमा खटिएको सशस्त्र प्रहरी बलको टोलीले स १ ख ५३५ नम्बरको ट्रक नियन्त्रणमा लिएको हो । नेपालबाट भारततर्फ अवैध रूपमा तस्करी गर्न लागिएको आशङ्कामा ट्रकलाई चालकसहित नियन्त्रणमा लिइएको सशस्त्र प्रहरीले जनाएको छ ।

नियन्त्रणमा लिइएको ट्रक हाल सिरहाको सन्हैठास्थित सशस्त्र प्रहरी बल नेपाल नम्बर ७ गण सिरहामा राखिएको सशस्त्र प्रहरी नायव उपरीक्षक (डिएसपी) श्याम बाबु यादवले जानकारी दिए।

उनका अनुसार बरामद सामानको यकिन परिमाण तथा मूल्याङ्कन कार्य भइरहेको छ । अहिले नै सम्पूर्ण विवरण भन्न सकिने अवस्था छैन, भोलि बिहान मात्रै सामानको परिमाण र मूल्याङ्कन सार्वजनिक गर्न सकिन्छ डिएसपी यादवले बताए ।

ट्रक नियन्त्रणमा लिन प्रहरी र तस्करहरूबिच झडप समेत भएको सशस्त्र प्रहरी बल नेपाल नम्बर ७ गण सिरहाले जनाएको छ । यो विषय थप अनुसन्धान भइरहेको सशस्त्र प्रहरी नायव उपरीक्षक (डिएसपी) श्याम बाबु यादवले जानकारी दिए ।