'कंगाल करोडपति' मा मुकुनसँग जोडी बाँध्दै सलिना

• असार १७, २०८३ | १९३ पटक पढिएको | सीमा संदेश

अभिनेत्री सलिना तामाङ फिल्म 'कंगाल करोडपति'मा अभिनेता मुकुन भुसालको अपोजिट मुख्य भूमिकामा अनुबन्धित भएकी छन्।

राजु श्रेष्ठको निर्देशनमा बन्न लागेको यस फिल्ममार्फत सलिनाले नेपाली फिल्म उद्योगमा डेब्यू गर्न लागेकी हुन्।

निर्माण टिमका अनुसार सलिनाले यसै महिना फिल्मसँग औपचारिक सम्झौता गरेकी हुन्। 'कंगाल करोडपति'मा मुकुन र सलिना पहिलो पटक पर्दामा जोडीका रूपमा देखिनेछन्।

फिल्ममा अनुबन्धित भएपछि सलिनाले 'कंगाल करोडपति' आफ्नो डेब्यूका लागि उपयुक्त फिल्म भएको बताएकी छन्। 

'यस फिल्ममा एउटा पात्रका रूपमा अभिनय गर्ने अवसर पाउँदा म अत्यन्तै खुसी छु। मेरो अभिनय र यो फिल्मलाई दर्शकले माया र साथ दिनुहुनेछ भन्ने अपेक्षा गरेकी छु,' उनले भनिन्।

सलिनाले भारतको मुम्बईस्थित 'द एक्टर्स ट्रुथ'बाट बलिउडका चर्चित अभिनय प्रशिक्षक तथा अभिनेता सौरभ सचदेवासँग अभिनय प्रशिक्षण लिएकी छन्। सचदेव रणवीर कपूर अभिनीत ब्लकबस्टर फिल्म 'एनिमल'सहित विभिन्न चर्चित फिल्ममा अभिनय गरिसकेका अभिनेता हुन्।

'कंगाल करोडपति' सिनेमा पाठशाला प्रालिको ब्यानरमा निर्माण हुँदैछ। फिल्मका प्रस्तुतकर्ता प्रविन आचार्य हुन् भने निर्माता अनिलकुमार बुढाथोकी रहेका छन्। सह-निर्मातामा छिरिङ तामाङ, प्रबिन राई र प्रवेश सापकोटा छन्। रीता श्रेष्ठ तामाङ र सुरज कुमार लाइन प्रोड्युसरका रूपमा रहेका छन्।

फिल्मको कथा सुमन गजमेरले लेखेका हुन्। निर्माण टिमका अनुसार केही कलाकारको छनोट भइसकेको छ भने नयाँ पात्रका लागि छिट्टै अडिसनको घोषणा गरिने तयारी भइरहेको छ।