ब्राउनसुगरजस्तो देखिने पदार्थसहित पक्राउ

• साउन १, २०८३ | १०१ पटक पढिएको | सीमा संदेश

बटुवाको आवरणमा पैदल हिँडेर सीमावर्ती भारतीय बजार हुँदै नेपालतर्फ आउँदै गरेका सिन्धुलीका एक व्यक्ति ब्राउनसुगरजस्तो देखिने पदार्थसहित सिराहामा पक्राउ गरेका छन् । जिल्ला प्रहरी कार्यालय सिराहाका अनुसार सिराहा नगरपालिका– १७ माडरस्थित इलाका प्रहरी कार्यालयबाट खटिएको प्रहरी गस्ती टोलीले सिन्धुलीको कमलामाई नगरपालिका– ६ घर भएका करिब ४४ वर्षीय महेशकुमार थापालाई बुधबार साँझ पक्राउ गरेको हो ।

शंकास्पद अवस्थामा आउँदै गरेका थापामाथि शंका लागेर रोकेर खानतलासी गर्दा पाइन्टको खल्तीबाट प्लास्टिकबाहेक नौ ग्राम ब्राउनसुगरजस्तो देखिने पदार्थ बरामद भएको सिराहा प्रहरीका प्रहरीका सूचना अधिकारी प्रहरी नायब उपरीक्षक रमेशबहादुर पालले जानकारी दिए । 

ब्राउनसुगरजस्तो देखिने पदार्थ बरामद भएपछि तत्काल थापालाई नियन्त्रणमा लिई जिल्ला प्रहरीमा राखेर थप अनुसन्धान भइरहेको प्रहरीले जनाएको छ । त्यसअघि प्रहरीले सिराहाको मिर्चैया नगरपालिका– ६ कटारी चोकबाट ३० असारको राति बेकरी पसलमा लुकाएर राखिएको प्लास्टिकबाहेक ७० मिलिग्राम ब्राउनसुगजस्तो देखिने पदार्थ, २२ हजार २५० रुपैयाँ नगद, पाँच थान मोबाइल बरामदसँगै बेकरी सञ्चालक मिर्चैया– १ का करिब ३५ वर्षीय उमेश श्रेष्ठ, मिर्चैया– ८ जीवा टोलका करिब ३२ वर्षीय चन्द्रप्रसाद गिरी, मिर्चैया– ६ का करिब २१ वर्षीय देवकुमार पासवानलाई पक्राउ गरेको थियो ।