चन्दा सहयोगबाट सर्पदंशका बिरामी दाजुभाइको उपचार हुदै

• भदौ ६, २०८३ | ९५ पटक पढिएको | सीमा संदेश

सिराहाको दक्षिणी सीमावर्ती भगवानपुर गाउँपालिका– २, गम्हरिया गाउँका विपन्न परिवारका सहोदर दाजुभाइलाई सुतेको ओछ्यानमै विषालु सर्पले डसेपछि आफन्त र मनकारीहरूको आर्थिक सहयोगमा उपचार चलिरहेको परिवारजनले जनाएको छ।

स्थानीय अशोक भगत र बबिताकुमारी भगतका तीन सन्तानमध्ये जेठो छोरा करिब ११ वर्षीय प्रियांसु भगत र सात वर्षीय दिव्यांसु भगतलाई गत बुधबार राति सुतेकै ओछ्यानमा करेत सर्पले डसेपछि विराटनगरस्थित विराट नर्सिङ होममा उपचार भइरहेको छ। राजनीतिकर्मीसमेत रहेका छिमेकी रामनाथ यादवका अनुसार सात धुर घडेरीबाहेक अन्य केही नभएकाले मजदुरी गरेर हातमुख जोड्दै आएको भगत परिवारलाई दुई नाबालकको उपचारमा स्थानीय गाउँले, युवा, व्यवसायीहरूले चन्दा सहयोग संकलनमार्फत उपचार चलिरहेको छ।

‘अहिलेसम्म स्थानीय युवाहरूले डिजिटल अभियानमार्फत तीन लाख रुपैयाँभन्दा बढी आर्थिक सहयोग संकलन गरी उपचारका लागि पठाइएको छ,’ उनले भने, ‘त्यसबाहेक स्थानीय गाउँलेहरूले पनि दुई नाबालकको उपचारका लागि आफ्नो गच्छेअनुसार सम्बन्धित परिवारलाई आर्थिक सहयोग गरिरहेका छन्।’ गाउँनजिकैको बालासुन्दरी मावि कक्षा ६ मा पढिरहेका प्रियांसुको अवस्था अझै गम्भीर रहेकाले भेन्टिलेटरमा राखेर उपचार भइरहेको र कान्छो दिव्यांसुको अवस्था खतरामुक्त रहेको जानकारी पाएको उनले बताए। दिव्यांसु पनि सोही विद्यालयमा कक्षा तीनमा पढिरहेका परिवारले जनाएको छ।

सर्पदंशका दुई नाबालक बिरामीको उपचारका लागि लहान उद्योग वाणिज्य संघका निवर्तमान अध्यक्षसमेत रहेका युवा व्यवसायी विकास शारदा, समाजसेवी जयकिशोर यादव, व्यवसायी रामउदगार महतोलगायत अन्य सर्वसाधारणले पनि उपचारका लागि आर्थिक सहयोग गरिरहेको परिवारले जनाएको छ।