सिरहामा ८१ वर्षीया वृद्धाले कोरोना जिते

• असार २०, २०७७ | ४७६ पटक पढिएको | बैधनाथ कुमार यादब

सिरहा । सिरहाको चन्द्र माध्यमिक विद्यालयको आइसोलेसनमा बसेकी सिरहा नगरपालिका– १९ सन्हैठाकी ८१ वर्षीया कागतीदेवी मण्डलसहित ६३ जना कोरोना जितेर घर फर्किएका छन् ।

मण्डल घरका सदस्य कोरोना संक्रमित भएपछि सिरहा क्याम्पसको क्वारेन्टाइनमा राखिएको थियो । दुई साता क्वारेन्टाइन बसाइको क्रममा गरिएको परीक्षणमा उनमा पनि कोरोना संक्रमण देखिएपछि चन्द्र माध्यमिक विद्यालयको आइसोलेसनमा राखिएको थियो ।

करिब २० दिनमा दुईपटक स्वाब संकलन गरी कोरोना परीक्षण गर्दा रिपोर्ट निगेटिभ आएपछि मण्डललाई डिस्चार्ज गरिएको छ । उनीसँगै सिरहाको चन्द्र माध्यमिक विद्यालय ४९ जना र महेन्द्र गेनाई मेटरनिटी अस्पतालको आइसोलेसनबाट १४ जना गरी कुल ६३ जना  डिस्चार्ज भएको डा। सुभाष मण्डलले जानकारी दिइएको छ । डिस्चार्ज हुनेहरू लहान नगरपालिकाका तीन, धनगढीमाई नगरपालिकाका दुई, कर्जन्हा नगरपालिकाका एक र सिरहा नगरपालिका क्षेत्रका ५७ जना रहेका छन् ।

महेन्द्र गेनाईमा २५ र चन्द्र माध्यमिक विद्यालयको आइसोलेसनमा २४ जना गरी ४९ जना कोरोना संक्रमित अझै रहेको डा। मण्डलले बताए ।