सबल नेपालद्वारा विविध कार्यक्रम गरी बालदिवस मनाइयो

• भदौ २९, २०७८ | ५७१ पटक पढिएको | सीमा संदेश

सप्तरी, २९ भदौ । सबल नेपालको सहयोगमा सप्तरीमा विविध कार्यक्रमहरु गरी ५७ औँ राष्ट्रिय बालदिवस मनाइएको छ ।

खडक र सुरुङ्गा नगरपालिकाको समन्वयमा विविध कार्यक्रमहरु गरी बालदिवस मनाइएको फिल्ड अधिकृत खडक नारायण चौधरीले जानकारी दिएका छन् । ‘सामान्य अवस्था वा कोभिड महामारीः बालअधिकारको संरक्षण हामी सबैको जिम्मेबारी’ भन्ने नाराका साथ बालदिवस कार्यक्रम मनाइएको हो ।

सबल नेपालको सहकार्यमा सुरुङ्गा नगरपालिका महिला तथा बालबालिका शाखाको आयोजनामा मधुपट्टीमा कोरोना महामारीले शिक्षामा पारेको असर विषयमा वक्तृत्वकला प्रतियोगिता आयोजना गरिएको छ । त्यस्तै, खडक नगरपालिका शिक्षाशाखाको आयोजना तथा सबल नेपालको सहकार्यमा म्युजिकल चेयर र हाँडीफोर प्रतियोगिता कार्यक्रम गरिएको छ ।

सुरुङ्गा नगरपालिका–१० स्थित जनता आधारभूत विद्यालयको आयोजनामा नृत्य प्रतियोगिता, हाजिरीजवाफ र पठनशीप कार्यक्रम संचालन गरिएको छ । वडा बालक्लव सञ्जाल सुरुङ्गा–३ को आयोजनामा हाजिरीजवाफ प्रतियोगिता आयोजना गरिएको छ ।

त्यस्तै, सुरुङ्गा–२ स्थित जनता मा.वि. भेडियाद्वारा नगरपालिकाको शिक्षाशाखाको सहकार्यमा हाजिरी जवाफ कार्यक्रम आयोजना गरियो भने वडा बालक्लब सञ्जाल सुरुङ्गा–६ द्वारा श्रीपुर विद्यालयमा हाजिरी जवाफ प्रतियोगिता आयोजना गरिएको छ ।

सुरुङ्गा–११ वडा कार्यालयको समन्वयमा भजका विद्यालयमा नृत्य कार्यक्रम गरिएको छ भने खडक–२ आधारभूत विद्यालय दुहबीमा नृत्य प्रतियोगिता र नाटक प्रदर्शन गरिएको फिल्ड अधिकृत चौधरीले जानकारी दिएका छन् ।