डेंगीका कारण साउनयता ३९ जनाको मृत्यु, ३० हजार बढी संक्रमित

• असोज १५, २०७९ | ४१५ पटक पढिएको | सीमा संदेश

काठमाडौं । पछिल्लो समय नेपालमा डेंगी रोगको प्रकोप बढ्दै गएको छ ।

डेंगीका कारण यो वर्षको साउनयता हालसम्म ३९ जनाको मृत्यु भएको स्वास्थ्य तथा जनसंख्या मन्त्रालयले शनिबार जनाएको छ ।

डेंगी रोग हाल सातै प्रदेशअन्तर्गतका ७६ जिल्लामा फैलिएको छ । मन्त्रालयका अनुसार यो अवधिमा ३० हजार १८० जना डेंगी संक्रमित भएका छन् ।

हाल सबैभन्दा बढी संक्रमित काठमाडौं उपत्यकामा छन् । डेंगी मानिसबाट मानिसमा सर्ने रोग भने होइन । यो एडिस एजिप्टी र एडिस एल्बोपिक्टस प्रजातिका लामखुट्टेहरूको टोकाइबाट सर्ने गर्छ । त्यसैले यसबाट जोगिन लामखुट्टेको टोकाइबाट बच्नुपर्ने मन्त्रालयले जनाएको छ ।