बस दुर्घटना हुँदा पाल्पामा एकै गाउँमा ६ यात्रुको मृत्यु

• पुस २२, २०७९ | ४०६ पटक पढिएको | सीमा संदेश

रूपन्देही । रुपन्देहीको सालझण्डी ढोरपाटन सडक अन्तर्गत पाल्पाको रैनादेवी छहरा गाउँपालिका- ८ खुर्सानेमा यात्रुबाहक बस दुर्घटनामा ६ जनाको मृत्यु भएको छ ।

रुपन्देहीको सालझण्डीबाट यात्रु लिएर पाल्पाको रैनादेवी छहराको खुर्साने गएको उक्त बस खुर्साने पुग्नै लाग्दा मधुवन टारीफाँटनजिकै राहादी गैरामा दुर्घटना भएको वडाअध्यक्ष रेमबहादुर रानाले नेपाल प्रेसलाई बताए ।उनका अनुसार मृतक सबै रैनादेवी छहरा- ८ खुर्सानेका छन् ।

ग. १ ख ४९७७ नम्बरको बस दुर्घटना हुँदा ६ जना महिलाको मृत्यु भएको हो । मृतकमा पाल्पा रैनादेवी ८ खुर्साने गाँउकी ३६ वर्षीया निर्मला घिमिरे, ११ वर्षीया सरुमाया घिमिरे, ५४ वर्षीया खिमकुमारी राना, ४० वर्षीया गिरिकुमारी गाहा, २१ वर्षीया सामकुमारी खत्री र १९ वर्षीया विना पाण्डे छन् ।

दुर्घटनामा घाइते भेटिएका १७ जनामध्ये १३ महिला र ४ जना पुरुष छन् । घाइतेले फोन गरेर प्रहरीलाई राति १० बजेतिर दुर्घटनाको जानकारी गराएका थिए । घाइतेहरूको लुम्बिनी प्रादेशिक अस्पतालमा उपचार भइरहेको राजमार्ग सुरक्षा ट्राफिक प्रहरी कार्यालय बुटवलले जनाएको छ ।

रातको समयमा जंगल क्षेत्रमा दुर्घटना भएका कारण समयमा उद्धार हुन सकेन । बस सडकबाट ५०/६० मिटर तल भीरमा खसेको बताइएको छ ।