मिथिला नगरपालिकाले सिजनल भिषामा दुई सय युवा कोरिया पठाउने

• फागुन ११, २०८० | २७७ पटक पढिएको | सीमा संदेश

धनुषाको मिथिला नगरपालिकाले बेरोजगारी समस्या समाधान गर्न झण्डै दुई सय युवालाई सिजनल भिसामा कामदार कोरिया पठाउने भएको छ ।

कृषि क्षेत्रका कामदारहरुलाई सिजनल भिसामा कोरिया पठाउन मिथिला नगरपालिका र कृषि विकास अनुसन्धान परिषद् कोरियाबीच शुक्रवार व्यापार सम्झौता भएको छ । मौसमी कृषि श्रमिक आपूर्तिका लागि आपसी आदान प्रदान र सहयोग कायम गर्ने उद्देश्यले सो व्यापार सम्झौता गरिएको हो ।

सम्झौतापत्रमा कृषि विकास अनुसन्धान संघ कोरियाका अध्यक्ष युन चुन—सियोप र मिथिला नगरपालिका नगर प्रमुख महेन्द्र महतोले हस्ताक्षर गरेका छन् ।
मौसमी कृषिका लागि कोरियाको ग्रामीण क्षेत्रहरुमा श्रमिक आभाव समाधान गर्न पारस्परिक सहमति भएका उत्कृष्ट कृषि श्रमिक भर्ती, तालिम र आपूर्ति व्यवस्थापन लगयातका विषय सम्झौतापत्रमा समेटिएको नगरप्रमुख महतोले बताएका छन् । उनले भने यो सम्झौताले युवा बेरोजगारी समस्या धेरै हदसम्म समाधान हुनेछ ।

पहिलो चरणमा नगरपालिका भित्रका करीब दुईसय युवालाई तालिम प्रशिक्षण दिई मौसमी कृषि कार्यकालागि कोरियो पठाइने छ । सो सम्झौता अन्तर्गत एक वर्षमा ८ महिना काम गर्नुपर्ने र चार महिना घर आउने विदा दिइनेछ । सो विदा कटेपछि पुन रोजगारीका लागि कोरिया पठाइनेछ । सो सम्झौता अनुसार कुनै म्यानपावर वा एजेन्ट मार्फत कामदारलाई नपठाई यहाँका स्थानीय सरकार र कोरियाको स्थानीय सरकारबीचको समन्वयमा पठाइनेछ ।

सम्झौता विभिन्न पांच धारामा गरिएको छ । पहिलो धारा सम्झौताको महत्व, दोश्रो धारा सम्झौताको सामाग्री, तेश्रो धारामा सहयोगी विधि, चौथो धारामा सम्झौताको विधि र अन्तिम पांचौ धारामा सम्झौताको प्रभावकारिता उल्लेख गरिएको छ ।
कामदारहरुको भर्ती र प्रशिक्षण सम्बन्धी जानकारीको आदानप्रदान, कामदार आपूर्ति र व्यवस्थापनमा जानकारी आदानप्रदान, आपसी कर्मचारीहरु साइट भ्रमण, रोजगारीसँग सम्बन्धित स्थानीय सरकारसँग औपचारिक हस्ताक्षर र पारस्परिक विकाससँग सम्बन्धित विषयहरु सम्झौताको सामाग्री रहेको छ ।