बाइडेनलाई फोन गरेर पेलोसीले भनिन्– ट्रम्पलाई हराउन गाह्रो छ

• साउन ४, २०८१ | ४११ पटक पढिएको | सीमा संदेश

वासिङ्टन–अमेरिकाकी पूर्वसभामुख न्यान्सी पेलोसीले अमेरिकी राष्ट्रपति चुनावमा जो बाइडेनले डोनाल्ड ट्रम्पलाई हराउन गाह्रो हुनेतर्फ सचेत गराएकी छिन् । 

पेलोसीले राष्ट्रपति बाइडेन फोन गरेर यस्तो सचेत गराएको चार स्रोतलाई उद्धृत गर्दै सीएनएनले जनाएको छ 

नोभेम्बरमा हुन गइरहेको निर्वाचनमा बाइडेन दोस्रो कार्यकालका लागि राष्ट्रपतिमा निर्वाचित हुन प्रयास गरिरहँदा उनकै दल डेमोक्रेटिक पार्टीकी सदस्य पेलोसीको यस्तो भनाइ आएको हो । 

यद्यपि राष्ट्रपति बाइडेनले भने उनको भनाइ अस्वीकार गर्दै आफूले जित्नसक्ने आधारसहितको सर्वेक्षण देखाएको एक स्रोतले उल्लेख गरेको छ ।

अर्कोतिर पेलोसीले बाइडेनका लामो समयका सल्लाहकार माइक डोनिलोनलाई पनि तथ्यांकमा रहेर जित्ने दाबी गर्न आग्रह गरेको बताइएको छ । 

‘चुनाव लड्ने वा नलड्ने भन्ने निर्णय राष्ट्रपतिमा निर्भर छ,’ गत साता एक अन्तर्वार्तामा पेलोसीले भनेकी थिइन्, ‘समय छोटो भएकाले हामी सबैले उहाँलाई सचेत गराइरहेका र प्रोत्साहित गरिरहेका छौँ ।’

सीएनएनको रिपोर्टअनुसार अर्को स्रोतले बाइडेनलाई निर्वाचनका बारेमा रक्षात्मक बनाएको छ । 

गत साता पूर्वराष्ट्रपति बाराक ओबामा र पेलोसीले ट्रम्पविरुद्ध बाइडेनको सम्भावनामा बढ्दो ‘कठिनाइ’माथि प्रकाश पार्दै उनको २०२४ अभियानबारे चिन्ता व्यक्त गरेका थिए । 

यतिबेला राष्ट्रपति​ बाइडेनको दल डेमोक्रेटिक पार्टीभित्र आन्तरिक कलह छ । यसको अन्त्य गर्दै रिपब्लिकन पार्टीका उम्मेदवार पूर्वराष्ट्रपति ट्रम्पलाई हराउन बाइडेनमाथि चुनौती थपिएको छ ।