जनमत पार्टीकी सांसद गोमालाई पदबाट हटाउन नमिल्ने सभामुखको निर्णय

• मंसिर ७, २०८१ | ५३० पटक पढिएको | सीमा संदेश

डा.सिके राउत नेतृत्वको जनमत पार्टीका सांसद गोमा लाभ सापकोटालाई सांसद पदबाट नहटाइने भएको छ ।

पार्टी अध्यक्ष राउतले सांसद पदबाट हटाउनका लागि सिफारिस गरेकोमा सभामुख देवराज घिमिरेले पदबाट नहटाउने निर्णय गरेको संघीय संसद सचिवालयका महासचिव पदमप्रसाद पाण्डेले जानकारी दिए ।

सापकोटाले पद नै जाने प्रकृतिको कुनै काम गरेको नदेखिएकाले उनलाई पदमुक्त नगरिएको सचिवालयले जनाएको छ ।

जनमत पार्टीले सापकोटालाई राजनैतिक दल सम्बन्धी ऐन, २०७३ को दफा १८ लाई टेकी दलबाट निष्कासन गरी संघीय संसदको सदस्यको पद नरहने गरी सूचना प्रकाशन गर्न निवेदन गरेकोमा निजले पद नै जाने प्रकृतिको कुनै काम गरेको नदेखिएको, दलबाट निष्कासन गरी संघीय संसदको सदस्यको पद नरहने प्रकृतिको अन्य कुनै कानूनले परिभाषित गरेको कसूर गरेको भन्ने समेत नदेखिएको, कारबाहीको सम्बन्धमा तयार गरिएका कागजपत्रहरु विश्वसनीय नदेखिएकोले सभामुखले थप कारबाही अगाडि नबढाउने निर्णय गरेका हुन् ।

‘दलीय प्रणालीमा दलका नेता तथा कार्यकर्ताले आफ्नो दलको अनुशासन पालना गर्नु पर्नेमा कुनै द्विविधा छैन’, सभामुख देवराज घिमिरेले भने, ‘तर, अनुशासनको नाममा कुनै सदस्यले स्पष्ट गल्ती गरेको नदेखिएको अवस्थामा पूर्वाग्रहपूर्ण तरिकाबाट कारबाही गर्ने र पदच्यूत गर्ने वातावरण सिर्जना भयो भने त्यसले लोकतन्त्रको मूल्य र मान्यतामा आघात पुर्‍याउँछ ।’