चाहना विपरीत पटक-पटक यौनसम्पर्क राख्न खाेजेकाे भन्दै चिर्पटले हानेर श्रीमानको हत्या

• वैशाख ३१, २०८२ | १०९ पटक पढिएको | सीमा संदेश

दाङको बंगलाचुली गाउँपालिका वडा नं ७ हल्दीकी ५० वर्षीय संगीता सुनारी मगरले श्रीमानले आफ्नो चाहना विपरीत पटक पटक यौनसम्पर्क गर्न खोजेपछि रिसको झोँकमा दाउराले हानेर श्रीमानको हत्या गरेकी छन् । ६५ वर्षीय श्रीमान पुनाराम सुनारी मगरलाई उनले सोमबार साँझ आफ्नै घरमा हानेको प्रहरीसमक्ष स्वीकार गरेकी हुन् ।

इलाका प्रहरी कार्यालय भालुवाङका प्रहरी निरीक्षक पुस्कर सिंह ऐरीका अनुसार सुनारीले श्रीमानको हत्या गरेको खबर त्यहाँबाट वडाध्यक्षले टेलिफोनमा खबर गरेपछि आफूहरु पुगेर उनलाई घरबाटै पक्राउ गरिएको हो । प्रहरीले उनलाई सोमबार राति प्रहरीले पक्राउ गरेर घटनाको थप अनुसन्धान गरिरहेको जनाएको उनले बताए ।

‘वडाध्यक्षले खबर गरेपछि हामीले स्थानीयलाई निज महिलालाई बाहिर भाग्न नदिन आग्रह गरेर गएका थियौं, हामीले मृतकको शव र उनकी श्रीमतिलाई लिएर आएका हौं सोमबार राती नै’ उनले भने –‘संगीताले श्रीमानले आफ्नो चाहना विपरीत पटक पटक सम्बन्ध राख्न खोजेपछि रिसले सुरुमा टर्चलाइट र पछि नजिकै रहेको दाउराले हानेको बताएकी छन्, त्यो टर्च र दाउरा पनि सँगै ल्याएका छौं ।’

प्रहरी निरीक्षक ऐरीका अनुसार सोमबार साँझ दुवैजनाले सँगै बसेर गहुँको छ्याङ खाएका थिए । खाएपछि केही मात्तिएका श्रीमानले श्रीमतिलाई जिस्काएको र चाहना विपरीत सम्बन्धका लागि पटक पटक प्रयास गरेको दावी ती महिलाले गरेकी छन् ।

वंगलाचुली गाउँपालिका वडा नं ७ का अध्यक्ष गिरबहादुर थापाले दोस्रो बिहे गरेका दुवैजनाबीच पहिले पनि विवाद भएको र सोमबार राती यस्तो घटना भएको जानकारी दिए । ‘पहिले पनि ती महिलाले श्रीमानलाई मार्न खोजेको भनेर उजुरी आएको थियो, तर गाउँले बसेर सम्झाएपछि समाधान भएको रहेछ, दुवैले रक्सी खाएर झगला गर्नेरहेछन्, हिजो राती घटना सुनेपछि प्रहरीलाई बोलाएर म पनि गएको हुँ, महिलाले रिसको झोँकमा हानेको प्रहरीलाई बताएकी छन्, अब दुई छोराछोरीको व्यवस्थापन चुनौती थपिएको छ’ उनले भने ।