अभिनेत्री परिणीति चोपडा बनिन् आमा, छोरालाई दिइन् जन्म

• कार्तिक ३, २०८२ | ३९२ पटक पढिएको | सीमा संदेश

मुम्बई । बलिउड अभिनेत्री परिणीति चोपडा आमा बनेकी छिन्। उनले आइतबार छोरालाई जन्म दिएकी हुन्। परिणीतिका पति तथा राज्यसभा सांसद राघव चड्ढाले सामाजिक सञ्जालमार्फत यो खबर सार्वजनिक गरेका छन्।

राघव चड्ढाले इन्स्टाग्राममा एक तस्बिर सेयर गर्दै लेखेका छन्, ‘ऊ अन्ततः आइपुगेको छ! हाम्रो छोरा, र साँच्चै भन्नुपर्दा, हामीलाई यसभन्दा पहिलेको जीवन याद छैन ! हाम्रा हातहरू पूर्ण भएका छन्, हाम्रो मन अझ पूर्ण भएको छ। पहिले हामीसँग एक-अर्का मात्र थियौँ, अब हामीसँग सबै थोक छ। आभारसहित, परिणीति र राघव।’

यो जोडीले सन् २०२५ अगस्ट २५ मा आफूहरू माता-पिता बन्न लागेको आधिकारिक घोषणा गरेको थियो। सन् २०२३ मा विवाह बन्धनमा बाँधिएका परिणीति र राघवको विवाहमा बलिउड र राजनीतिक क्षेत्रका थुप्रै हस्तीहरूको उपस्थिति थियो। 

परिणीतिले सन् २०११ मा 'लेडीज भर्सेस रिकी बहल'बाट बलिउडमा डेब्यु गरेकी थिइन् र त्यसपछि 'इश्कजादे', 'शुद्ध देशी रोमान्स' र 'अमर सिंह चमकीला' जस्ता सफल फिल्ममा काम गरेकी छन्।