अश्लील गीतमाथि प्रतिबन्धको माग

• कार्तिक ५, २०८२ | ५८९ पटक पढिएको | सीमा संदेश

जनकपुरधाम । धनुषाको शहिदनगर नगरपालिकाभित्र अश्लील  गीत र चर्को साउण्ड सिस्टममाथि प्रतिबन्ध लगाउन युवाहरूले माग गरेका छन् ।

शहिदनगर युवा मञ्चका प्रतिनिधिहरूले इलाका प्रशासन कार्यालय यदुकुहा पुगेर यस सम्बन्धमा ज्ञापनपत्र बुझाएका छन् ।

मञ्चका अगुवा लालबाबु मण्डलको नेतृत्वमा गएको टोलीमा इन्जिनियर नरेश यादव, राकेश यादव, अन्मोल भण्डारी, झगरु यादवलगायत युवाहरू सहभागी थिए । 

उनीहरूले छठ पर्वका समयमा चर्को साउण्डमा अश्लील गीत बज्ने, ध्वनि प्रदूषण बढ्ने र सामाजिक सौहार्दमा असर पर्ने जनाउँदै प्रशासनलाई तत्काल रोकथामका लागि पहल गर्न आग्रह गरेका हुन् ।

ज्ञापनपत्रमा छठमा लाउडस्पिकरको प्रयोगमा नियन्त्रण, अश्लील गीतमाथि पूर्ण प्रतिबन्ध र सुरक्षालाई कडाइका साथ सुनिश्चित गर्न माग गरिएको छ।युवाहरूले भनेका छन्,“संस्कृति र धार्मिक पर्वहरूलाई मर्यादित र सभ्य ढंगले मनाउन सबैले जिम्मेवारीपूर्वक व्यवहार गर्नुपर्छ । अश्लील गीत र चर्को साउण्डले समाजमा गलत सन्देश फैलाउँछ ।”

प्रशासनले ज्ञापनपत्र प्राप्त गरेको र युवाहरूको मागबारे आवश्यक समन्वय गरी स्थानीय प्रशासन र सुरक्षाका निकायलाई निर्देशन दिने तयारी गरेको जनाएको छ ।