मधेशमा १२ को उम्मेदवारी फिर्ता

• माघ १०, २०८२ | २६८ पटक पढिएको | सीमा संदेश

फागुन २१ गते हुने प्रतिनिधि सभाको निर्वाचनका लागि मनोनयन दर्ता गराएका मध्ये मधेश प्रदेशबाट १२ जनाले उम्मेदवारी फिर्ता लिएका छन् ।

माघ ६ गते उम्मेदवारी दर्तागरेका मध्ये देशभरिमा ४९ जनाले उम्मेदवारी फिर्ता लिएकोमा १२ जना मधेश प्रदेशकै रहेको आयोगका प्रवक्ता नारायणप्रसाद भट्टराईले जानकारी दिएका छन् । आयोगका अनुसार प्रदेशका सिरहाबाट १, महोत्तरीबाट ४, सर्लाहीबाट २, रौतहटबाट १, बाराबाट २ र पर्साबाट २ जनाले उम्मेदवारी फिर्ता लिएको छ ।

फिर्ता लिनेहरुमा अधिकांश स्वतन्त्रका रहेका छन भने उनीहरुले व्यक्तिगत कारण, उम्मेदवार बन्ने इच्छा नभएको र विशेष कारण देखाउंदै उम्मेदवारी फिर्ता लिएको आयोगले जनाएको छ । उम्मेदवारी फिर्ता लिनेहरुमा सिरहा क्षेत्र नं. ४ बाट आम जनता पार्टीका विरेन्द्र प्रसाद साह, महोत्तरीको क्षेत्र नं. १ बाट स्वतन्त्रतर्फ टेकप्रसाद पोखरेल, प्रमोद कुमार साह, महोत्तरी क्षेत्र नं. ३ बाट स्वतन्त्रतर्फ राधेश्याम तिवारी, महोत्तरी क्षेत्र नं. ४ बाट स्वतन्त्रतर्फ संजय कुमार चौधरी रहेका छन् ।

सर्लाही क्षेत्र नं. १ बाट स्वतन्त्रतर्फ भरत थापा, सर्लाही क्षेत्र नं. ४ बाट स्वतन्त्रतर्फ महेश प्रसाद यादव, रौतहट क्षेत्र नं. ३ बाट स्वतन्त्रतर्फ अमिन्द्र राय यादव, बारा क्षेत्र नं. ४ बाट नेपाल संघीय समाजवादी पार्टीका कलामुद्दीन कवारी, डेमोक्रेट पार्टीका नरबहादुर श्रेष्ठ र पर्सा २ बाट स्वतन्त्रतर्फका राजेश्वर प्रसाद साह क्षेत्र नं. ४ बाट पिपुल्स फस्र्ट पार्टीका फिरोज अन्सारीले उम्मेदवारी फिर्ता लिएको हो ।

राजनीतिक दल र स्वतन्त्र गरी देशभरिमा तीन हजार ४८७ जनाले उम्मेदवारी दिएकामध्ये ४९ जनाले उम्मेदवारी फिर्ता लिएका एक पत्रकार सम्मेलन गरी जानकारी दिएका छन् । मधेश प्रदेशमा १ हजार ४८ उम्मेदवार ५६४ जना स्वतन्त्र उम्मेदवार रहेका थिए । स्वतन्त्र उम्मेदवार मध्ये अधिकांश डमी उम्मेदवार रहेका छन् ।