सिराहामा दुई केन्द्राध्यक्षसहित ६ जना निष्कासित

• चैत २०, २०८२ | १९९ पटक पढिएको | सीमा संदेश

माध्यमिक शिक्षा परीक्षा (एसईई) को दोस्रो दिन नेपाली विषयको परीक्षामा सिरहाबाट अनुगमन टोलीले करिब दुई सय मोबाइल बरामद गरेको छ । जिल्लाका विभिन्न ९ वटा परीक्षा केन्द्रबाट २ थान स्मार्ट वाच र १९४ थान मोबाइल नियन्त्रणमा लिइएको शिक्षा विकास तथा समन्वय इकाई सिरहाले जनाएको छ ।

अनुगमनका क्रममा मोबाइलसहित संलग्न रहेको आरोपमा २ जना केन्द्राध्यक्ष र ४ जना निरीक्षकलाई निष्कासन गरिएको छ । निष्कासन हुनेमा बालमन्दिर माध्यमिक विद्यालय, सिरहा सदरमुकामका केन्द्राध्यक्ष संजय यादव र जनता माध्यमिक विद्यालय फुलबरियाका केन्द्राध्यक्ष रामकिशोर यादव  छन् ।

शिक्षा समन्वय इकाई प्रमुख दिपक राज कनौलीका अनुसार प्रमुख जिल्ला अधिकारी सुरेन्द्र पाण्डेको नेतृत्वमा गएको अनुगमन टोलीले परीक्षा अमर्यादित बनाएको  पाइएपछि कारबाही गरिएको हो ।

यो वर्ष सिरहाबाट कुल ११ हजार ३७ विद्यार्थी एसईई परीक्षामा सहभागी भएका छन्। जसमा साधारणतर्फ १० हजार ६२५ र प्राविधिकतर्फ ४१२ जना रहेका छन्। परीक्षार्थीमध्ये ५ हजार ३०८ छात्रा र ५ हजार ७२९ छात्र छन् ।

जिल्लामा परीक्षा सञ्चालनका लागि ५१ वटा केन्द्र निर्धारण गरिएको छ । राष्ट्रिय परीक्षा बोर्डका अनुसार एसईई परीक्षा चैत १९ गतेदेखि २९ गतेसम्म बिहान ८ बजेदेखि ११ बजेसम्म सञ्चालन हुनेछ ।