गोलबजारबाट २८ किलो गाँजासहित तीन जना पक्राउ

• असार ३, २०८३ | २६३ पटक पढिएको | सीमा संदेश

गोलबजार प्रहरीले प्रतिबन्धित करिब २८ किलो गाँजासहित एक भारतीय र दुई नेपाली गरी तीनजनालाई पक्राउ गरेको  छ। गाँजा ओसारपोसार भइरहेको गोप्य सूचनाको आधारमा गोलबजारस्थित इलाका प्रहरी कार्यालयले सोमबार राति गोलबजार नगरपालिका– ७, चोहर्वाबाट पाँच किलो ७१५ ग्राम र गोलबजार– १० बाट थप २२ किलो गाँजासहितसहित तीनजनालाई पक्राउ गरेको हो ।

प्रहरीले चुरे क्षेत्रमा पर्ने धर्मपुर हुँदै चोहर्वा बजारतर्फ आउँदै गरेको नम्बर नखुलेको अटोलाई रोकी चेकजाँच गर्दा बोरामा प्याक गरी लुकाइएको पाँच किलो ७१५ ग्राम गाँजा बरामद भएको जनाएको छ। प्रहरीका अनुसार अटोमा गाँजा बरामद भएपछि प्रहरीले अटोचालक गोलबजार– ७ घर भएका करिब ३६ वर्षीय रोकेन्द्रबहादुर सुनुवार र अटोमा सवार भारतको बिहार राज्य, पटना जिल्ला धनरुवा ग्राम पञ्चायत निवासी करिब ३० वर्षीय रोहित कुमारलाई पक्राउ गरिएको हो । 

प्रहरीको फन्दामा परेका भारतीय नागरिक रोहितले सोधपुछका क्रममा दिएको सूचनाको आधारमा गोलबजार– १० का छकबहादुरको घरमा पुगेर खानतलासी गर्दा चारवटा बोरामा प्याक गरेर राखिएको २२ किलो गाँजा बरामद भएको गोलबजार प्रहरीले जनाएको छ । गाँजा बरामद भएपछि उनलाई समेत पक्राउ गरी तीनजनालाई नै गोलबजार प्रहरीमा ल्याएर थप अनुसन्धान भइरहेको प्रहरीले जनाएको छ ।