भेनेजुएला भूकम्प : भग्नावशेषबाट नवजात शिशुको ३२ घण्टापछि जीवितै उद्धार

• असार १४, २०८३ | ४६ पटक पढिएको | सीमा संदेश

भेनेजुएलामा गएको विनाशकारी भूकम्पपछि उद्धारकर्मीहरूले भग्नावशेषमुनिबाट एक नवजात शिशुलाई ३२ घण्टापछि जीवितै उद्धार गरेका छन् ।

स्थानीय सञ्चारमाध्यमका अनुसार उत्तरी भेनेजुएलाको ला ग्वाइरा क्षेत्रमा भत्किएको भवनको भग्नावशेषमुनि फसेका करिब १८ दिनको शिशुलाई अमेरिकी खोज तथा उद्धार टोलीले जीवितै उद्धार गरेको हो ।

भिडियोमा उद्धारकर्मीहरूले शिशुलाई सावधानीपूर्वक बाहिर निकालेको देखिन्छ । त्यसपछि ती शिशुलाई उपचारका लागि पठाइएको थियो ।

शिशुको उद्धारको केही समयपछि उनकी आमालाई पनि जीवितै उद्धार गरिएको अन्तर्राष्ट्रिय सञ्चारमाध्यमहरूले जनाएका छन् । भूकम्पपछि करिब ३२ घण्टासम्म भग्नावशेषमुनि रहे पनि शिशु र आमाको अवस्था स्थिर रहेको बताइएको छ ।

सयौं उद्धारकर्मीहरू अझै पनि भग्नावशेषमा फसेका सम्भावित जीवित व्यक्तिहरूको खोजीमा जुटिरहेका छन्।

यसैबीच, संयुक्त राज्य अमेरिकाले प्रभावित क्षेत्रमा उद्धार तथा राहत कार्यलाई सघाउन थप विमान, उद्धारकर्मी, सैन्य जनशक्ति तथा आपत्कालीन सहायता सामग्री परिचालन गरिरहेको जनाएको छ । अमेरिकी तथा अन्तर्राष्ट्रिय उद्धार टोलीहरूले स्थानीय निकायसँग समन्वय गरेर जीवन बचाउने अभियानलाई तीव्रता दिएको फक्स न्यूजले जनाएको छ ।

मृतकको संख्या १ हजार ४३० पुग्यो

२०२६ जुन २८ मा भूकम्पका दुई शक्तिशाली धक्काका भेनेजुएलामा कम्तीमा १४३० जनाको मृत्यु भएको एपी न्यूजले जनाएको छ । ३ हजार २०० भन्दा बढी घाइते छन् भने ६८ हजार भन्दा धेरै व्यक्ति सम्पर्कविहीनको सूचीमा छन् ।

ला ग्वाइरा, राजधानी काराकास र ती आसपासका क्षेत्र सबैभन्दा बढी प्रभावित छन् । प्रभावित क्षेत्रमा उद्धार कार्य अझै जारी रहेकाले मृतकको संख्या थप बढ्न सक्ने अनुमान छ ।

अमेरिका, अर्जेन्टिना, एल साल्भाडोरलगायतका देशका खोज तथा उद्धार टोलीहरू सहभागी छन् ।